Azərbaycan Milli Elmlər Akademiyası (AMEA) Nəsimi adına Dilçilik İnstitutunun şöbə müdiri, professor Sayalı Sadıqova, filologiya üzrə fəlsəfə doktorları Natəvan Hüseynova, İradə Abdullayeva, Svetlana Novruzova və Şəbnəm Həsənli-Qəribovanın tərtibatçılığı ilə “İzahlı dilçilik terminləri lüğəti” nəşr olunub.

Akademiyadan AzEdu.az-a-a bildirilib ki, lüğətin baş redaktorları AMEA-nın vitse-prezidenti, akademik İsa Həbibbəyli və Dilçilik İnstitutunun direktoru, akademik Möhsün Nağısoylu, elmi redaktoru isə professor Sayalı Sadıqovadır. Nəşrin rəyçiləri akademik Nizami Cəfərov və professor Qəzənfər Kazımovdur.

Vəsaitdə elmi-tədqiqat və tədris prosesində tez-tez rast gəlinən 8500 terminin definitiv tərifi və şərhi yer alıb. Lüğətdə dilçilik terminlərinin geniş, daha dolğun izahı verilib, həmçinin terminlərin orfoqrafiyası müasir ədəbi dilimizin orfoqrafiya normalarına uyğun əksini tapıb.