Son illərdə Türkiyənin ali təhsil müəssisələri azərbaycanlı tələbələr arasında həm coğrafi yaxınlıq, həm də təqdim etdiyi akademik imkanlara görə xüsusi maraq doğurur. Türkiyə universitetləri beynəlxalq reytinqlərdə mövqelərini gücləndirdikcə, xarici tələbələrin, xüsusilə də azərbaycanlı gənclərin bu universitetlərə marağı daha da artıb.
Azərbaycanlı tələbələrin Türkiyədə universitet seçimlərində əsas diqqət yetirdiyi məqamlar arasında təhsilin keyfiyyəti, beynəlxalq tanınma, ingilis dilində tədris imkanları, akademik mühit, elmi araşdırma imkanları və məzun olduqdan sonra karyera perspektivləri xüsusi yer tutur.
Bu çərçivədə Türkiyədə təhsil almaq hüququ qazanan azərbaycanlı tələbələrin universitet seçimləri də diqqət çəkir. AzEdu.az tərəfindən “2022-2028-ci illər üçün Dövlət Proqramı” çərçivəsində Türkiyə Respublikasında təhsil almaq hüququ qazanan 177 tələbənin universitet seçimləri təhlil edilib.
Aparılan təhlilə əsasən, azərbaycanlı tələbələr daha çox beynəlxalq səviyyədə tanınan, akademik göstəriciləri yüksək olan universitetlərə üstünlük veriblər. Siyahının ilk pilləsində Bilkent Universiteti qərarlaşıb. Bu universiteti 65 azərbaycanlı tələbə seçib. İkinci sırada Koç Universiteti yer alıb və 47 tələbə bu ali təhsil müəssisəsində oxumaq hüququ qazanıb. Üçüncü ən çox seçilən universitet isə Sabancı Universiti olub. Sabancı Universitetinə üstünlük verən tələbələrin sayı 30 nəfər təşkil edib.
Bu üç universitetin ön sıralarda olması təsadüfi deyil. Türkiyənin ən nüfuzlu özəl universitetləri sırasında yer alan Bilkent, Koç və Sabancı həm akademik standartları, həm də beynəlxalq əlaqələri ilə xarici tələbələr üçün cəlbedici seçim hesab olunur.
1984-cü ildə Ankarada yaradılan Bilkent Universiteti Türkiyənin ilk özəl universitetlərindən biri olmaqla yanaşı, ölkənin ən nüfuzlu ali təhsil müəssisələrindən biri hesab edilir. Universitetin adı “Bilim Kenti” ifadəsindən gəlir və əsas məqsədi elmi araşdırmalara, innovasiyaya və beynəlxalq standartlara uyğun təhsilə əsaslanan akademik mühit yaratmaqdır.
Bilkent Universitetinin azərbaycanlı tələbələr arasında ilk sırada qərarlaşmasının əsas səbəblərindən biri onun beynəlxalq nüfuzudur. Universitet uzun illər ərzində Türkiyənin ən yüksək akademik göstəricilərinə malik ali məktəblərindən biri kimi tanınıb. Tədrisin böyük hissəsinin ingilis dilində aparılması da xarici tələbələr üçün mühüm üstünlük yaradır.
Universitetdə humanitar elmlərdən mühəndisliyə, iqtisadiyyatdan incəsənətə qədər geniş spektrdə ixtisaslar tədris olunur. Ən çox seçilən istiqamətlər arasında kompüter mühəndisliyi, elektrik-elektronika mühəndisliyi, sənaye mühəndisliyi, iqtisadiyyat, beynəlxalq münasibətlər, psixologiya, biznes idarəçiliyi, hüquq, memarlıq və kommunikasiya sahələri yer alır.
Xüsusilə texnologiya və mühəndislik istiqamətlərində Bilkent Universiteti regionda güclü mövqeyə malikdir. Universitetin kompüter mühəndisliyi və informasiya texnologiyaları sahəsində təqdim etdiyi proqramlar həm Türkiyədə, həm də beynəlxalq səviyyədə yüksək qiymətləndirilir. Süni intellekt, proqramlaşdırma, məlumat elmləri və innovasiya yönümlü araşdırmalar tələbələrin maraq göstərdiyi əsas sahələrdəndir.
Bilkenti xarici tələbələr üçün cəlbedici edən digər amillərdən biri də güclü akademik heyətidir. Universitetdə dünyanın müxtəlif ölkələrindən gəlmiş professorlar fəaliyyət göstərir. Bu isə tələbələrə yalnız yerli deyil, beynəlxalq akademik mühitdə təhsil almaq imkanı yaradır.
Universitetin geniş kampus imkanları, kitabxana infrastrukturu, araşdırma mərkəzləri və tələbə klubları da xarici tələbələrin seçimində mühüm rol oynayır. Bilkent tələbələrə yalnız nəzəri bilik deyil, eyni zamanda praktiki bacarıqlar və elmi fəaliyyət imkanları təqdim edir.
Azərbaycanlı tələbələr üçün Bilkentin digər üstünlüyü isə məzunlarının əmək bazarında yüksək qiymətləndirilməsidir. Universitet məzunları Türkiyənin və dünyanın aparıcı şirkətlərində, elmi müəssisələrində və beynəlxalq təşkilatlarında fəaliyyət göstərirlər.
1993-cü ildə İstanbulda fəaliyyətə başlayan Koç Universiteti qısa müddət ərzində Türkiyənin ən nüfuzlu universitetlərindən birinə çevrilib. Universitet xüsusilə tədqiqat yönümlü fəaliyyəti, beynəlxalq əməkdaşlıqları və yüksək akademik standartları ilə seçilir.
Azərbaycanlı tələbələrin seçimində ikinci sırada yer alan Koç Universitetini 47 tələbənin seçməsi universitetin regionda artan nüfuzunu göstərir. Koç xüsusilə sosial elmlər, biznes, iqtisadiyyat, mühəndislik və tibb sahələrində güclü proqramları ilə tanınır.
Universitetdə əsas tədris olunan ixtisaslar arasında biznes idarəçiliyi, iqtisadiyyat, beynəlxalq münasibətlər, psixologiya, kompüter mühəndisliyi, elektrik-elektronika mühəndisliyi, kimya və biologiya elmləri, hüquq və tibb yer alır.
Koç Universitetinin ən diqqətçəkən xüsusiyyətlərindən biri elmi araşdırmalara verdiyi önəmdir. Universitet tələbələrə müxtəlif laboratoriyalarda, araşdırma mərkəzlərində və beynəlxalq layihələrdə iştirak etmək imkanı yaradır. Bu xüsusiyyət xüsusilə magistr və doktorantura səviyyəsində təhsil almaq istəyən xarici tələbələr üçün böyük üstünlük hesab olunur.
Koç Universitetinin tibb fakültəsi Türkiyənin ən tanınmış tibb məktəblərindən biridir. Müasir xəstəxana infrastrukturu və praktik təhsil imkanları tələbələrə real klinik təcrübə qazandırır. Buna görə də tibb sahəsində təhsil almaq istəyən beynəlxalq tələbələr arasında universitetə maraq yüksəkdir.
Xarici tələbələrin Koç Universitetini seçməsinin əsas səbəblərindən biri də universitetin beynəlxalq əlaqələridir. Dünyanın müxtəlif ölkələrində yerləşən universitetlərlə əməkdaşlıqlar, tələbə mübadilə proqramları və beynəlxalq akademik layihələr tələbələrə qlobal təcrübə qazanmaq imkanı verir.
Koç Universiteti həmçinin məzunlarının karyera imkanları ilə seçilir. Universitetin məzun şəbəkəsi Türkiyənin aparıcı şirkətləri və beynəlxalq qurumları ilə sıx əlaqələrə malikdir. Bu da tələbələrin təhsil sonrası iş imkanlarını genişləndirən əsas faktorlardan biridir.
Azərbaycanlı tələbələrin Türkiyədə ən çox üstünlük verdiyi universitetlər siyahısında üçüncü sırada yer alan Sabancı Universiti 1996-cı ildə İstanbulda yaradılıb. Qısa tarixə baxmayaraq, universitet Türkiyənin ən nüfuzlu ali təhsil müəssisələrindən birinə çevrilib və xüsusilə innovativ təhsil modeli, beynəlxalq əlaqələri və araşdırma imkanları ilə seçilir.
Sabancı Universitetinin digər bir çox universitetdən fərqləndirən əsas xüsusiyyətlərindən biri tələbələrə erkən ixtisaslaşma imkanı verməməsidir. Universitetdə tələbələr ilk illərdə geniş akademik baza əldə edir, daha sonra maraq dairələrinə uyğun olaraq ixtisas istiqamətlərini müəyyənləşdirirlər. Bu yanaşma tələbələrə daha çevik seçim etmək və müxtəlif sahələri birləşdirərək yeni biliklər əldə etmək imkanı yaradır.
Azərbaycanlı tələbələr arasında Sabancı Universitetinin populyarlığının əsas səbəblərindən biri onun beynəlxalq standartlara uyğun təhsil sistemidir. Universitetdə dərslərin əsas hissəsi ingilis dilində keçirilir və xarici tələbələr üçün akademik mühitə uyğunlaşmaq daha asan olur.
Sabancı Universitetində əsas tədris olunan sahələr arasında kompüter elmləri və mühəndisliyi, elektronika mühəndisliyi, sənaye mühəndisliyi, mexanika mühəndisliyi, materialşünaslıq, iqtisadiyyat, biznes analitikası, idarəetmə elmləri, beynəlxalq münasibətlər, psixologiya və siyasi elmlər yer alır.
Son illərdə texnologiya yönümlü ixtisaslara marağın artması Sabancı Universitetinə müraciət edən tələbələrin profilinə də təsir edib. Xüsusilə süni intellekt, proqram təminatı, robototexnika, məlumat analitikası və rəqəmsal texnologiyalar sahələri tələbələr arasında daha çox maraq görür.
Universitetin elmi araşdırma fəaliyyəti də onun beynəlxalq nüfuzunun əsas səbəblərindən biridir. Sabancı Universitetində müxtəlif tədqiqat mərkəzləri fəaliyyət göstərir və tələbələr bakalavr səviyyəsindən etibarən elmi layihələrdə iştirak etmək imkanına malikdirlər. Bu imkan xüsusilə akademik karyera qurmaq istəyən tələbələr üçün mühüm üstünlük yaradır.
Sabancı Universitetini xarici tələbələr üçün cəlbedici edən digər faktor isə beynəlxalq əməkdaşlıqlarıdır. Universitet dünyanın müxtəlif ölkələrində yerləşən ali təhsil müəssisələri ilə əlaqələrə malikdir və tələbələr üçün mübadilə proqramları, ikili diplom imkanları və beynəlxalq layihələr təqdim edir.
Bundan əlavə, İstanbulda yerləşməsi də Sabancı Universitetinin üstünlüklərindən biridir. İstanbul həm Türkiyənin iqtisadi mərkəzi, həm də beynəlxalq şirkətlərin fəaliyyət göstərdiyi böyük bir şəhərdir. Bu isə tələbələrə təhsil müddətində təcrübə proqramlarında iştirak etmək və müxtəlif karyera imkanlarından yararlanmaq şansı verir.
