İngiltərədə müəllimlərin maaşlarının artırılması ilə bağlı yeni qərar qəbul edilib.
AzEdu.az xarici mediaya istinadən xəbər verir ki, ölkədə müəllimlər 2026-cı ilin sentyabrından etibarən 3,5 faiz, 2027-ci ilin sentyabrından isə əlavə 3 faiz maaş artımı alacaqlar.
Məlumata görə, ilkin mərhələdə maaş artımının bir hissəsinin məktəblərin mövcud büdcələri hesabına qarşılanması nəzərdə tutulurdu. Lakin müəllim həmkarlar ittifaqlarının etirazlarından sonra hökumət artımın tam maliyyələşdiriləcəyini açıqlayıb.
Bu məqsədlə məktəblərə əlavə təxminən 500 milyon funt sterlinq vəsait ayrılacaq. Hökumət bildirib ki, maliyyə yerli idarəetmə pensiya sistemində aparılan yenidən qiymətləndirmə nəticəsində əldə olunan qənaət hesabına təmin ediləcək.
Milli Təhsil Birliyi (NEU) qərarı müsbət qiymətləndirib. Birliyin nümayəndələri hesab edirlər ki, maaş artımının tam maliyyələşdirilməsi məktəblərin əlavə ixtisarlara getməsinin qarşısını ala bilər.
Qeyd edək ki, qərar müəllim peşəsinin cəlbediciliyinin artırılması, kadr çatışmazlığının azaldılması və müəllimlərin işdə saxlanılması istiqamətində atılan addımlardan biri kimi qiymətləndirilir.
