Uşaqlıqdan bəri tez-tez eşidilən "Televizora çox baxma, beyninə zərər verər" xəbərdarlığının elmi əsası olduğu müəyyən edilib. Yeni araşdırma uzun müddət televiziya izləməyin beyin sağlamlığına mənfi təsir göstərə biləcəyini ortaya qoyub.
AzEdu.az xəbər verir ki, Alzheimer's and Dementia jurnalında dərc olunan araşdırmada 1 700-dən çox yetkin şəxs təxminən 24 il ərzində izlənilib. Nəticələrə əsasən, orta yaş dövründə uzun müddət televiziya izləyən kişilərdə beyin həcmində kiçilmə müşahidə olunub.
Tədqiqat zamanı bu kiçilmənin əsasən Alzheimer xəstəliyinə qarşı daha həssas olan beyin nahiyələrində baş verdiyi müəyyənləşdirilib. Alimlər bunun idrak qabiliyyətinin zəifləməsi ilə əlaqəli dəyişikliklərin artmasına səbəb ola biləcəyini bildiriblər.
Araşdırmada diqqət çəkən digər nəticə isə oturaq həyat tərzi ilə bağlı olub. Günün böyük hissəsini oturaraq keçirən, lakin bu müddətdə krossvord həll edən, elektron məktublara cavab yazan və ya digər zehni fəaliyyət tələb edən işlərlə məşğul olan şəxslərin beyin quruluşunun daha sağlam qaldığı müəyyən edilib.
Tədqiqat televiziya izləməyin beyin quruluşuna təsirinin kişilərdə qadınlarla müqayisədə daha güclü olduğunu da göstərib. Mütəxəssislər bunu qadınların oturaq vaxtlarını daha tez-tez fasilələrlə bölməsi, eləcə də cinsiyyətlər arasındakı bioloji fərqlərlə əlaqələndirirlər. Həmçinin qadınların televiziyanı daha qısa müddət izlədiyi, kişilərin isə xüsusilə idman yarışları və filmlər səbəbindən ekran qarşısında daha uzun müddət fasiləsiz qaldığı qeyd olunur.
Cənubi Kaliforniya Universitetinin tədqiqatçıları bildiriblər ki, beyin sağlamlığı baxımından təkcə nə qədər müddət oturmaq deyil, oturarkən hansı fəaliyyətlə məşğul olmaq da böyük əhəmiyyət daşıyır. Onların sözlərinə görə, televiziya izləmək passiv fəaliyyət hesab olunsa da, oxumaq, yazmaq, planlaşdırmaq və problem həll etmək kimi zehni fəaliyyətlər beynin yaşlanmaya qarşı davamlılığını artıran idrak ehtiyatının formalaşmasına kömək edir.
Araşdırmanın nəticələrinə görə, müntəzəm fiziki aktivlik belə uzun müddət televiziya izləməyin mənfi təsirlərini tam aradan qaldırmır. Mütəxəssislər beyin sağlamlığını qorumaq üçün ekran qarşısında uzun müddət qalan şəxslərə tez-tez fasilə verməyi tövsiyə edirlər.
