27 may 2023-cü il tarixində Dövlət İmtahan Mərkəzi (DİM) tərəfindən ali təhsil müəssisələrinin qabiliyyət tələb edən musiqi sənəti istiqaməti üzrə ixtisasların Harmoniya və solfecio, Musiqi nəzəriyyəsi və solfecio fənləri üzrə sınaq imtahanları keçiriləcək.    

AzEdu.az xəbər verir ki, imtahan Bakı şəhəri Nərimanov rayonu 258 nömrəli məktəbdə (S.Rəhman küçəsi, 34) təşkil olunacaq.

İmtahan iştirakçıları imtahanın başlanmasından ən az 1 saat 30 dəqiqə əvvəl imtahan binasına gəlməlidirlər. İmtahan binasına daxil olarkən iştirakçı imtahana buraxılış vərəqəsi və şəxsiyyətini təsdiq edən sənədi təqdim etməlidir (iştirakçının şəxsiyyəti təsdiq edən sənədi olmadıqda şəxsiyyət vəsiqəsinin notarial qaydada təsdiq olunmuş surətini və ya ümumvətəndaş pasportunu təqdim edə bilər). Əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini təqdim edirlər. Tələb olunan sənədi təqdim etməyən iştirakçı imtahan binasına buraxılmır.

İmtahan binasına mobil telefon, ağıllı saat və digər rabitə vasitələri, kalkulyator və digər elektron cihazlar, konspekt, lüğət, cədvəl, çanta, məlumat kitabçası, xarici yaddaş qurğuları və başqa yardımçı vasitələr gətirmək və onlardan istifadə etmək qadağandır.

İmtahanda 177 namizədin iştirakı nəzərdə tutulur. Onlardan 112 nəfər musiqi nəzəriyyəsi və solfecio, 50 nəfər harmoniya və solfecio, 5 nəfər isə həm musiqi nəzəriyyəsi və solfecio, həm də harmoniya və solfecio fənnləri üzrə imtahanda iştirak etmək üçün qeydiyyatdan keçib.

Harmoniya və solfecio fənni üzrə imtahanın müddəti 1 saat 30 dəqiqədir. Musiqi nəzəriyyəsi və solfecio fənni üzrə imtahanın müddəti isə 1 saatdır.

“Harmoniya və solfecio”, “Musiqi nəzəriyyəsi və solfecio” fənlərinin hər biri üzrə iştirakçılara 30 qapalı tipli tapşırıq təqdim olunur.

İmtahanın qiymətləndirməsi fənlərin hər biri üzrə 10 ballıq şkalada aparılır.