Müəllimlərin işə qəbulu üzrə müsabiqənin əlavə yerləşdirmə mərhələsi üzrə vakansiya seçimində uğur əldə edənlərin müsahibəsi orta təhsil müəssisələrində baş tutacaq.

AzEdu.az xəbər verir ki, bu barədə Təhsil Nazirliyinin İnsan resursları şöbəsinin müdir müavini Murad Camalzadəyə məlumat verib.

Məlumata əsasən, namizədlərin əlavə yerləşdirmə üzrə müsahibə mərhələsi 2-3 sentyabr tarixlərini əhatə edəcək. Əvvəlkindən fərqli olaraq, bu dəfə müsahibə Azərbaycan Texniki Universitetinin idman zalında deyil, orta təhsil müəssisələrində baş tutacaq. Namizədlərin hansı məktəbdə müsahibə verəcəkləri onların şəxsi hesablarına göndəriləcək.

Bildirilib ki, müsahibədən keçən namizədlər müddətsiz əsaslarla işlə təmin olunacaqlar.

Qeyd edək ki, müəllimlərin işə qəbulu müsabiqəsinin əlavə yerləşdirmə mərhələsi üzrə vakansiya seçimi bu gün başa çatır.

Əlavə yerləşdirmədə iştirak etmək istəyən namizədlər bu gün saat 23:59-dək vakant yer seçib elektron ərizələrini təsdiq etməlidirlər.

İndiyədək 19 879 namizəd bu mərhələdə iştirak edib, onlardan 2 996 namizəd elektron ərizəsini təsdiqləyib.