Məktəbəqədər təhsil müəssisələrində uşaqların təlim-tərbiyə prosesində valideynlərin iştirakı və məlumatlandırılması qanunvericiliklə tənzimlənir.
Valideynlər yalnız övladları üçün bağça seçmək hüququna malik deyil, həm də təhsil prosesinin keyfiyyəti, uşaqların davranışı, qidalanması və tibbi müayinəsi barədə məlumat ala bilərlər.
AzEdu.az xəbər verir ki, “Məktəbəqədər təhsil haqqında” Qanunun 19-cu maddəsində valideynlərin və digər qanuni nümayəndələrin hüquq və vəzifələri müəyyənləşdirilib.
Qanuna əsasən, valideynlərin əsas hüquqlarından biri övladları üçün məktəbəqədər təhsil müəssisəsini seçməkdir. Onlar, həmçinin müəssisədə təhsil prosesinin təşkili və keyfiyyəti, uşaqlarının davranışı, təhsilə marağı, qidalanması, tibbi müayinəsi və xidmət şəraiti haqqında məlumat almaq hüququna malikdirlər.
Bununla yanaşı, valideynlər təhsilalanların hüquq və maraqlarını müdafiə edə, müəssisənin ictimai idarəolunmasında və mədəni-kütləvi tədbirlərin təşkilində iştirak edə bilərlər. Onların müəssisə rəhbərliyi və pedaqoji kollektivlə əməkdaşlıq etmək, təlim-tərbiyə prosesinin təkmilləşdirilməsi ilə bağlı təkliflər irəli sürmək hüququ da var.
Qanunvericilikdə valideynlərin yalnız hüquqları deyil, vəzifələri də müəyyən edilib. Belə ki, onlar övladlarının erkən yaşdan fiziki, əxlaqi və intellektual inkişafına şərait yaratmalıdırlar.
Eyni zamanda, valideynlər uşaqlarını Azərbaycan xalqının adət-ənənələrinə, mənəvi dəyərlərə, azərbaycançılıq məfkurəsinə, Vətənə və ana dilinə hörmət və məhəbbət ruhunda tərbiyə etməlidirlər.
Bundan başqa, valideynlər məktəbəqədər təhsil müəssisəsinin daxili intizam qaydalarına, eləcə də müəssisə ilə aralarında bağlanmış müqavilənin şərtlərinə əməl etməlidirlər.
Beləliklə, qanunvericilik valideynlərin məktəbəqədər təhsil prosesində iştirakını, uşaqlarının təlim-tərbiyəsi ilə bağlı məlumat əldə etməsini və müəssisənin fəaliyyətinə dair təkliflər verməsini nəzərdə tutur. Eyni zamanda, uşaqların inkişafına şərait yaratmaq və bağçanın daxili qaydalarına riayət etmək valideynlərin əsas vəzifələri sırasındadır.
