https://www.zirve.edu.az/
28.10.2020 11:11
Qusarın üç kəndində yeni modul tipli məktəblər quraşdırılır    

 

Qusar rayonunun Qullar kəndində yeni modul tipli məktəb quraşdırılır.

 

AzEdu.az xəbər verir ki, beş sinif və müəllimlər otağından ibarət məktəbin tikintisinə bir ay əvvəl başlanılıb. Qullar kəndində 80 ailə yaşayır. Kənddəki yeni tədris ocağında 40 şagirdin təhsil alması üçün şərait yaradılacaq.

 

Məktəb direktoru Çəmən Əkbərova bildirib ki, yeni məktəb müasir istilik sistemi ilə təchiz olunacaq. Modul məktəbin quraşdırılması noyabr ayında yekunlaşacaq.

 

İş icraçısı Tariel Ağamirzəyev bildirib ki, bu binaların üstünlükləri azməsrəfli olması ilə yanaşı, qısa müddət ərzində istənilən relyefdə quraşdırılması, asan daşınması, şagirdlərin sayına uyğun olaraq sinif otaqlarının rahatlıqla azaldılıb artırılmasındadır.

 

Qusarın Qullar kəndi ilə yanaşı Langu və Torpaqkörpü kəndlərində də 40 yerlik modul məktəblər quraşdırılır. 420 şagird yerlik Quxuroba kənd tam orta məktəbində isə əsaslı təmir işləri aparılır. Qusardakı 86 məktəbdən iyirmisi son 5 il ərzində tikilib. Yeni məktəblərin 11-i modul tiplidir. Ümumilikdə son illərdə rayon məktəblərinin 65 faizi yenidən tikilib və ya təmir olunub.