XƏBƏRLƏR

10.10.2019 09:40
Vurğun Əyyubun Qırxı çıxmamış “Testi mən gətirmişəm” deməyi Firudin Cəlilova yaraşdırdınızmı?..

AzEdu.az Azərbaycanın sabiq təhsil naziri Firudin Cəlilov ölkədə test üsulunun tətbiqinin tarixçəsi ilə bağlı Bakupost.az-a açıqlama verib.

"Mən Rəhim Hüseynovun vaxtında Baş nazirin müavini işləyirdim. İnstitutlar, məktəblər mənim kurasiyamda idi. Mən də test imtahanlarını gətirmək istəyirdim, amma bu çox ağır bir məsələ idi. Sərəncam verdim, qəbul imtahanlarını dayandırdılar ki, testə keçək. Sərəncamımdan bir ay sonra Elçibəy hakimiyyətə gəldi. Ona dedim ki, bu, artıq mənim səlahiyyətimdə olan bir iş deyil. Prezident sənsən, ya "hə” de, ya "yox”. Razılıq vermədi. Orada bizim Elçibəylə möhkəm davamız oldu. Bu söhbətdə Pənah Hüseyn, İsa Qəmbər, Arif Hacılı, İxtiyar Şirin də iştirak edib. Amma 30 ildə birinin qeyrəti çatıb bu barədə danışmadı. Heç kim etiraf etmədi ki, test üsulunu təhsilə Vurğun yox, Firudin gətirib”.

Maraqlı odur ki, Firudin Cəlilov bu fikirlərini  Tələbə Qəbulu üzrə Dövlət Komissiyasının 1-ci sədri olmuş Vurğun Əyyub bu il sentyabrın 24-də dünyasını dəyişəndən sonra ilk dəfə səsləndirir.

Doğrudur, Firudin Cəlilov Azərbaycanın ən əxlaqlı, ədəbli, sözünü tutan fikir adamı, ziyalısı kimi tanınır.

Bütün bunlara rəğmən, hətta test üsulunu Azərbaycana o gətiribsə belə, onun cəbhədaşı Vurğun Əyyubun Qırx mərasimi çıxmamış belə belə fikir səsləndirməsi ən yumşaq şəkildə ifadə etsək, heç bir əndazəyə çıxmır.

Məlumdur və təkzibedilməzdir ki, test üsulu Azərbaycanda onların hakimiyyəti zamanında tətbiq olunub.

Bir məsələyə aidiyyatı olan Vurğun Əyyub sağ ikən deyil, onun ölümündən sonra bu şəkildə fikrin ortaya atılması Firudin Cəlilova yaraşmadı. Hətta gerçəkdən bu ideyanın müəllifi, tətbiqçisi o olsa belə, vallah yaraşmadı.

Siz yaraşdırdınızmı?..

İlin gənc müəllimi-Müraciət formu