“Əla müəllim üstəgəl süni intellektdən istifadə edən müəllim bir az da əla müəllimdir”.
AzEdu.az xəbər verir ki, elm və təhsil naziri Emin Əmrullayev süni intellektin müəllim fəaliyyətinin təkmilləşdirilməsində yaratdığı imkanlardan danışıb.
Nazir bu barədə Bakı Dövlət Universitetində keçirilən “Təhsildə yeni çağırışlar VII Beynəlxalq Forum”da çıxışı zamanı danışıb.
Emin Əmrullayev qeyd edib ki, süni intellektdüniən effektiv istifadə müəllimin fəaliyyətinə əlavə imkanlar qazandıra bilər:
“Sual-cavabın mahiyyəti də bundan ibarətdir. Mənim üçün cavab budur ki, süni intellektdən zəif istifadə edən müəllimi yaxşı müəllim hesab etmək olmaz. Eyni zamanda, yaşından asılı olmayaraq, süni intellekt özü-özlüyündə əla müəllimi əvəz edə bilməz.
Amma əla müəllim süni intellektdən də istifadə edirsə, bu, onun imkanlarını daha da genişləndirir və onu daha yaxşı müəllimə çevirir. Yəni süni intellekt müəllim fəaliyyətində çox şeyi dəyişə bilər.
Əsasən iki məsələdə çox diqqətli olmalıyıq. Biri birbaşa qiymətləndirmədir. Qiymətləndirmə prosesində süni intellektin müəyyən nailiyyətlərin qiymətləndirilməsində mühüm imkanları ola bilər.
Artıq imtahan mətnlərinin toplanması, eləcə də şifahi cavabların qiymətləndirilməsi daha asandır. Bu baxımdan daha geniş platformanın yaradılması müzakirə mövzusu ola bilər.
İkinci vacib məsələ, təbii ki, sürət məsələsidir.
Texnoloji sürət öyrənmə ilə bağlı nailiyyətlərin daha sürətli ölçülməsinə, müəllim fəaliyyətinin ayrı-ayrı komponentlərinin qiymətləndirilməsinə və onların vahid strukturda təhlilinə imkan verir.
Düşünürəm ki, bunlar müəllim fəaliyyəti ilə şagird nailiyyəti arasındakı əlaqəni daha yaxşı başa düşmək baxımından süni intellektin bizə verə biləcəyi mühüm imkanlardır.
Məsələn, Bakı nümayəndəliyində Təhsil İnstitutunun təqdim etdiyi materiallarda bir neçə komponent var idi: müəllimin dərsi necə qurması, müəllim və şagird haqqında məlumatlar və digər göstəricilər. Lakin hələ də tam anlamırıq ki, danışdığımız və ümumiləşdirdiyimiz məsələlərdən, məsələn, dərsin idarə olunması, yaxud vaxtın idarə edilməsi kimi komponentlərdən hansının öyrənməyə daha çox təsir etdiyini ayrı-ayrı müəllim, sinif və məktəb kontekstində necə müəyyənləşdirə bilərik.
Bizim datamız var, amma hələlik onu bir-biri ilə tam əlaqələndirə bilmirik. Düşünürəm ki, bu mənada süni intellekt tətbiqləri bizə daha sürətli qərar qəbul etmək imkanı verəcək.
Amma bunun üçün, təbii ki, süni intellektdən istifadə etməyi öyrənmək lazımdır. Bu da öz-özlüyündə fərqli bacarıqlar tələb edir. Dediyim kimi, bunu inkar etməklə irəliyə gedə bilməyəcəyik”.
