Oyunlar uşaqların psixoloji inkişafında əsaslı yer tutur.

Onlar oyun vasitəsilə bir-birləri ilə ünsiyyətə girir, yeni dostlar qazanırlar. Həmçinin, başqalarına hörmət etmək, səbirli davranmaq, liderlik və s. bu kimi xüsusiyyətləri də əldə edirlər. Oyun fiziki, sosial, psixoloji və emosional tərəfdən uşağa təsir edir və inkişaf etməsində böyük rol oynayır.

Eyni zamanda, oyunun köməyi ilə uşaqlarda diqqət, qavrayış, hafizə, təfəkkür və təxəyyülün inkişafı üçün əlverişli şərait yaranır. Bəzi oyunlar isə sırf uşaqların zehni inkişafını təmin edir.

AzEdu.az belə oyunlardan bir neçəsini nəzərinizə çatdırır:

Bənzətmə oyunu

Uyğun yaş dövrü: 10 yaş və daha yuxarı.

İştirakçı sayı: 2 nəfərdən çox

Oynamaq üçün lazım olan vəsaitlər: heç bir vəsait lazım deyil.

Oyun necə oynanılır?

Bu oyun özündə klassik simulyasiya oyununun əsas qaydalarını ehtiva edir. Beləliklə, son hərflə başlayan söz deyərək,  iştirakçılar bir-birlərini başqa bir obyekt və ya heyvanla müqayisə edirlər. İlk oyunçu rəqibinə “at” deyərsə, digər iştirakçı həmin söz  "t" ilə bitdiyi üçün eyni hərflə başlayansöz seçib rəqibini ona bənzətməlidir. 

Artan bənzətmə oyununda ,oyuna ən az hərf sayında (iki hərfli) olan sözlə başlanmalıdır. Məsələn, rəqib tərəf başlayanda iki hərfli söz deyirsə, ondan sonrakı iştirakçı  üç hərfli söz tapıb deməlidir. Sonra bu qayda ilə davam edərək 4,5,6,7 hərfli və s. Maksimum hərf sayında söz tapana qədər oyun davam etməlidir.

Nümunə:
At – iki hərfli
Tar – Üç hərfli
Rəng – Dörd hərfli
Gümüş – Beş hərfli
Şimşək – Altı hərfli və s.

Klassik bənzətmə oyunlarındakı kimi oyunçu sonu 'ğ' hərfi ilə bitən söz deyərsə, oyunu qazanar. Eyni zamanda, hərf sayına uyğun söz tapa bilməyən də oyunda məğlub olur.

Nəticə: Sürətli və fərqli düşünmə qabiliyyətini artırır.