“Gəl danış” sosial təşəbbüs komandası "Bir səbət, bir ailə" və " Gəl oxu" layihələri çərçivəsində Zaqatala rayonun Gözbarax, Mamrux, Aşağı Tala, Yuxarı Tala kəndlərinə yollanıblar.
AzEdu.az xəbər verir ki, layihə təşkilatçıları imkansız ailələrə ərzaq, geyim, məktəbli uşaqlara isə məktəb ləvazimatları və s. hədiyyələr veriblər. Bununla yanaşı, məktəblilərə motivasiya xarakterli məktublar ünvanlanıb, dərs vəsaitləri, bədii kitablar, uşaq ədəbiyyatı nümunələri olmaqla 150-dən artıq kitab hədiyyə edilib.
Layihə rəhbəri bildirib ki, rayonlarda keçirilən belə tədbirlərə fevral ayından etibarən başlanılıb və ilk səfər Neftçala rayonu Həsənabad kəndinə olub.
“ Nefçala rayonuna getdiyimiz zaman burada 9-11-ci sinif şagirdlərinə "Düzgün ixtisas seçimi" mövzusunda seminar da vermişik. Bu il ərzində Quba rayonun Nügədi, Neftçala rayonun Həsənabad, Marnueli rayonun İlmazlo (2 dəfə), Zaqatala rayonun Aşağı Tala, Car, Yuxarı Çardaqlar kəndlərinə səfərlər təşkil etmişik. İndiyə qədər iki mindən artıq kitab öz oxucularına çatdırılıb”.
O qeyd edib ki, “Gəl danış” komandası olaraq hər şənbə-bazar günləri ictimai, fəlsəfi, psixoloji mövzularda seminarlar keçirilir.
Xatırladaq ki, “Gəl Danış” sosial təşəbbüs layihəsi 2018-ci il dörd noyabrda fəaliyyətə başlayıb.
Ayşə Müseyib
kitabı