Alimlər Kuiper qurşağından Yerə çatan kosmik toz zərrəciklərində milyardlarla il əvvələ aid suyun izlərini aşkar ediblər.
AzEdu.az xarici mediaya istinadən xəbər verir ki, NASA-nın yüksəkmənzilli təyyarələri vasitəsilə stratosferdən toplanan 12 toz zərrəciyinin araşdırılması zamanı onların tərkibində gil mineralları və ağır oksigen izotopları müəyyən edilib.
Bu tapıntılar həmin hissəciklərin yarandığı göy cisimlərinin daxilində uzaq keçmişdə maye suyun mövcud olduğunu göstərir.
Tədqiqatçılar hesab edirlər ki, radioaktiv parçalanma və kosmik toqquşmalar nəticəsində yaranan istilik buzlu göy cisimlərinin daxili hissələrində buzun əriməsinə səbəb olub. Su isə ətrafdakı süxurlarla reaksiyaya girərək mineralların formalaşmasında iştirak edib.
Araşdırmada həmçinin Saturnun ilkin Günəş sistemində maddələrin hərəkətini məhdudlaşdıraraq xarici bölgələrdəki qədim su ehtiyatının kimyəvi xüsusiyyətlərinin qorunmasına kömək etmiş ola biləcəyi bildirilir.
Alimlərin fikrincə, Yerə hər il düşən minlərlə ton kosmik tozun arasında Günəş sisteminin ilkin tarixinə aid başqa nümunələr də ola bilər.
Qeyd edək ki, araşdırmanın nəticələri “Science Advances” elmi jurnalında dərc olunub.
