Lənkəran Dövlət Universitetində (LDU) 31 mart - Azərbaycanlıların Soyqırımı Gününə həsr olunmuş tədbir keçirilib.
Universitetdən AzEdu.az-a bu barədə məlumat verilib.
Bildirilib ki, anım tədbirində universitetin professor-müəllim heyəti və tələbələr iştirak ediblər. Tədbir iştirakçıları soyqırım qurbanlarının xatirəsini bir dəqiqəlik sükutla yad ediblər. LDU-nun Sosial məsələlər üzrə prorektoru, prof. Kamran Kazımov 1918-ci ildə azərbaycanlılara qarşı ermənilər tərəfindən törədilmiş kütləvi soyqırım hadisələrini hər il anmaqla bu terroru dünyaya çatdırmağın vacib olduğunu bildirib. Prorektor qeyd edib ki, Ümummilli lider Heydər Əliyevin 1998-ci il 26 mart tarixində imzaladığı “Azərbaycanlıların soyqırımı haqqında” Fərmanında ilk dəfə olaraq bu hadisələrə siyasi və hüquqi qiymət verilib və azərbaycanlıların ermənilər tərəfindən soyqırıma məruz qalması faktları bütün dünyaya bəyan edilib. Tədbirdə universitetin dosenti, tarix üzrə fəlsəfə doktoru Müşfiq Bayramov “Ermənilərin mərhələli soyqırım siyasəti” mövzusunda geniş məruzə edib.
Məruzədə bildirilib ki, 31Mart soyqırımı öz amansızlığına və miqyasına görə bəşər tarixində ən qanlı faciələrdən biridir. Azərbaycanlıların kütləvi şəkildə doğma yurdlarından sürgün edilməsi və didərgin salınması ilə müşayiət edilən XX əsr tarixinin dəhşətli səhifələrindəndir. Azərbaycan ərazisinə köçürülmüş ermənilər tarixin muxtəlif mərhələlərində - 1905-1906, 1918-1920, 1948-1953, 1988 -1994 və digər illərdə yerli əhaliyə qarşı soyqırım siyasətini həyata keçirmişlər.
Ermənilər və onların havadarları tərəfindən Azərbaycan xalqına qarşı yönəldilmiş soyqırım siyasəti mərhələli və sistemli şəkildə həyata keçirilmişdir. Ermənilərin zaman-zaman məkrli siyasət yeridərək “Böyük Ermənistan” xulyasını həyata keçirməyə çalışmalarına baxmayaraq Azərbaycan xalqı onlara hər zaman lazımi cavab verib. 44 günlük Vətən muharibəsində xalqımız Prezident İlham Əliyevin rəhbərliyi altında bir daha mənfur düşmənlərimizə öz gücünü, qudrətini sübut edərək müzəffər ordumuzun gücü ilə tarixi ərazilərimizi ermənilərdən azad edib. LDU-nun “Tarixin tədrisi metodikası və metodologiyası” ixtisaslaşması üzrə II tədris ili tələbəsi Elmin Mustafayev çıxışında 1918-ci il martın 31-də erməni silahlı dəstələrinin Bakıda və bölgələrdə dinc əhaliyə qarşı başladığı dəhşətli qırğınlardan söz açıb.
31 Mart qırığınının faciəli nəticələrindən söz açaraq bildirib ki, baş verənlərin dünya ictimaiyyətinə çatdırılmasında Ümummilli lider Heydər Əliyev müstəsna rol oynayıb. E.Mustafayev Ali Baş Komandan İlham Əliyevin rəhbərliyi altında 44 günlük müharibədə xalqımızın qazandığı zəfəri, əzəli dədə- baba torpaqlarımızın erməni tapdağından azad edilməsini qəsbkar qonşularımızdan alınan qisas kimi dəyərləndirib. Tədbir 31 Mart-Azərbaycanlıların Soyqırımı Günündən bəhs edən videoçarxın nümayişi ilə yekunlaşıb.
