Türkiyədə milyonlarla abituriyentin gələcəyini müəyyən edəcək YKS imtahanına (Ali Təhsil Müəssisələrinə Qəbul İmtahanına) cəmi 1 gün qalıb.
AzEdu.az xəbər verir ki, ÖSYM tərəfindən təşkil edilən imtahan 20–21 iyun tarixlərində keçiriləcək və ölkənin bütün bölgələrindən namizədlər iştirak edəcək.
Açıqlanan statistikaya görə, bu il YKS-yə ümumilikdə milyonlarla namizəd müraciət edib. Əsas Bacarıq Testinə (TYT) 2 milyon 425 min 560 nəfər, Sahə Bacarığı Testinə (AYT) 1 milyon 628 min 200 nəfər, Xarici Dil Testinə (YDT) isə 203 min 679 nəfər qatılacaq.
YDT üzrə iştirakçılar dil bölgüsünə görə belədir: 195 min 85 nəfər ingilis dili, 4 min 181 nəfər ərəb dili, 2 min 552 nəfər alman dili, 919 nəfər fransız dili və 942 nəfər rus dili imtahanı verəcək.
Statistik məlumatlara əsasən, YKS-yə müraciət edənlərin 921 min 225-i ilk dəfə imtahanda iştirak edəcək. Bu göstərici imtahana yeni məzunların və gənc namizədlərin yüksək marağını ortaya qoyur.
Yaş bölgüsünə baxdıqda isə ən gənc namizədin 16, ən yaşlı namizədin isə 87 yaşında olduğu bildirilir. Bundan əlavə, 50 yaş və üzəri 20 min 159 namizəd də imtahana qatılacaq.
Rəsmilər imtahana bir gün qalmış namizədlərə hazırlıqları tamamlamalarını, sənədlərini yoxlamalarını və stressdən uzaq qalaraq istirahət etmələrini tövsiyə edirlər. YKS sabah start götürəcək və milyonlarla gəncin universitet arzusu üçün həlledici mərhələ olacaq.
