24-29 sentyabr 2023-cü il tarixlərində Yamaykanın paytaxtı Kinqston şəhərində Karib İmtahan Şurasının (CXC®) təşkilatçılığı ilə Təhsilin Qiymətləndirilməsi üzrə Beynəlxalq Assosiasiyanın (IAEA: International Association for Educational Assessment) “Qiymətləndirmə və kvalifikasiyaların rəqəmsallaşdırılması” mövzusunda 48-ci illik konfransı keçirilib. 

AzEdu.az xəbər verir ki, konfrans zamanı Dövlət İmtahan Mərkəzinin Direktorlar Şurasının sədri Məleykə Abbaszadənin rəhbərliyi ilə nümayəndə heyətinin üzvləri DİM-in fəaliyyəti ilə bağlı elmi işlərin təqdimatını ediblər. 

Konfransda Mərkəzin Dövlət dili və xarici dillər üzrə şöbəsinin müdiri Könül Hacıyeva tərəfindən “Azərbaycanda xarici dillər üzrə buraxılış imtahanının ümum-Avropa çərçivə sənədinə (CEFR) uyğunlaşdırılması”, Statistik araşdırmalar, elmi layihələşdirmə və innovasiyalar departamentinin sektor müdiri Elmir Şirinov və baş məsləhətçisi Sərxan Quliyev tərəfindən “Şagird-məzun” Dövlət Elektron İnformasiya Sisteminin ümumtəhsil müəssisələrinin məzunlarının yekun attestasiyası və təhsil sənədlərinin verilməsində rolu” və “Buraxılış və qəbul imtahanlarında istifadə olunan açıq tipli test tapşırıqları üzrə yazı işlərinin qiymətləndirilməsi prosesində iştirak edən mütəxəssislərin (markerlərin) fəaliyyətinin qiymətləndirilməsi” mövzusunda təqdimatlar edilib.

Təqdimatlardan sonra konfrans iştirakçılarının sualları cavablandırılıb və Dövlət İmtahan Mərkəzinin təcrübəsi ilə yaxından tanış olmaq istəyən iştirakçılarla müzakirələr aparılıb. Eyni zamanda Dövlət İmtahan Mərkəzinin fəaliyyətinin daha ətaflı tanıdılması məqsədilə konfrans zamanı iştirakçılara mərkəzin “Korporativ məlumat kitabçası” təqdim olunub.

Bundan əlavə, IAEA-nın hazırladığı “Təhsilin qiymətləndirilməsi ilə məşğul olan təşkilatlar üçün standartlar” əsasında 2023-cü ildə Dövlət İmtahan Mərkəzinin pilot layihə çərçivəsində özünüqiymətləndirmədə (həmçinin standartların təkmilləşdirilməsinə töhfənin verilməsində) iştirakı assosiasiyanın “Tanınma komitəsi” (IAEA Recognition Committee) tərəfindən yüksək qiymətləndirilib və bununla əlaqədar olaraq konfransın proqramında “Tanınma komitəsi”nin pilot layihə ilə bağlı ayrıca iclasında komitənin dəvəti üzrə DİM-in təcrübəsi təqdim olunub. 

Qeyd edək ki, Karib İmtahan Şurası tərəfindən keçirilən builki konfrans zamanı aşağıdakı mövzular üzrə təqdimatlar edilib:

Konfransın spikerləri Böyük Britaniya, Amerika, Kanada, İsrail, Malayziya, Niderland, Nigeriya və digər ölkələri təmsil ediblər. IAEA-nın 48-ci illik konfransı haqqında geniş məlumatı keçiddən əldə etmək mümkündür: iaea2023.org 

Qeyd edək ki, IAEA ümumi və ali təhsil müəssisələrində, müxtəlif təşkilatlarda və iş yerlərində təhsilin qiymətləndirilməsində iştirak edən qurumlar üçün yaradılmış qlobal forumdur. IAEA hər il təhsildə qiymətləndirmənin keyfiyyətinin artırılması və bu sahədə beynəlxalq əməkdaşlığın inkişafı məqsədilə illik beynəlxalq konfranslar təşkil edir. IAEA haqqında ətraflı məlumat: https://iaea.info/ 

Dövlət İmtahan mərkəzi uzun illərdir biliyin qiymətləndirilməsi sahəsində dövlətlərarası əməkdaşlığın qurulması, bu sahədə təcrübə mübadiləsinin aparılması, yeni qiymətləndirmə metodlarının tətbiqi məqsədilə yaradılmış IAEA ilə sıx əməkdaşlıq edir. DİM (əvvəlki TQDK-nın fəaliyyəti də daxil olmaqla) 1999-cu ildən IAEA-nın daimi üzvüdür. 2007-ci ildə IAEA-nın 33-cü illik konfransı TQDK-nın təşkilatçılığı ilə MDB və Şərqi Avropa dövlətləri arasında ilk dəfə Azərbaycanda keçirilib. 2019-cu ildə isə DİM tərəfindən IAEA-nın 45-ci illik konfransı keçirilib və həmin tədbirdə 500-dən artıq xarici təşkilatın nümayəndəsi iştirak edib.