Azərbaycanda orta ixtisas təhsili müəssisələrində çalışan professor-müəllim heyətinin sayı açıqlanıb.
AzEdu.az-ın Dövlət Statika Komitəsindən əldə etdiyi məlumata əsasən, 2025/2026-cı tədris ilinin əvvəlinə orta ixtisas təhsili müəssisələrində professor-müəllim heyətinin sayı 6 352 nəfər təşkil edib. Bu göstərici 2024/2025-ci tədris ilində 6 374 nəfər olub.
Məlumata görə, 2025/2026-cı tədris ilində orta ixtisas təhsili müəssisələrində çalışan müəllimlərdən 9 nəfəri elmlər doktoru, 104 nəfəri isə fəlsəfə doktorudur.
Elmi adlara gəlincə, professorların sayı 10, dosentlərin sayı isə 31 nəfər təşkil edib.
Statistikada qadınların sayı da əksini tapıb. Belə ki, 2025/2026-cı tədris ilinin əvvəlinə orta ixtisas təhsili müəssisələrində professor-müəllim heyətinin tərkibində 4 940 qadın olub. Müqayisə üçün qeyd edək ki, 2024/2025-ci tədris ilində bu göstərici 5 007 nəfər təşkil edib.
Qeyd edək ki, 2015/2016-cı tədris ilində orta ixtisas təhsili müəssisələrində professor-müəllim heyətinin ümumi sayı 6 104 nəfər olduğu halda, 2023/2024-cü tədris ilində bu rəqəm 6 449 nəfərə yüksəlib. Son iki tədris ilində isə azalma qeydə alınıb.
