“İmtahanda rahat yazmağımız üçün bütün şərait yaradılmışdı”
Bakı şəhəri 248 nömrəli orta məktəbin musiqi müəllimi Əzizə Babayeva sertifikasiya imtahanından sonra AzEdu.az-a təəssüratlarını bölüşüb.
15 ilə yaxın pedaqoji fəaliyyətlə məşğul olduğunu bildirən müəllim qeyd edib ki, son 6 ildə 248 nömrəli orta məktəbdə çalışır. O, sertifikasiya imtahanında 58 bal topladığını bildirib.
“İmtahanla bağlı hər şey qaydasında idi. Rahat şəkildə imtahan verməyimiz üçün bütün şərait yaradılmışdı”, - deyə Ə.Babayeva qeyd edib.
Müəllimin sözlərinə görə, imtahan sualları normal səviyyədə tərtib olunmuşdu və iştirakçıların biliklərini nümayiş etdirməsinə imkan verirdi.
“Suallar normal səviyyədə idi. Cavablandıra biləcəyimiz suallar idi”,- deyə o bildirib.
Ə.Babayeva imtahan zamanı müəyyən qədər həyəcan keçirdiyini etiraf etsə də, bunun nəticəyə ciddi təsir göstərmədiyini vurğulayıb.
Müəllim ümumilikdə sertifikasiya prosesindən razı qaldığını bildirərək həmkarlarına da uğurlar arzulayıb.
