Növbəti tədris ili üçün dövlət ümumi təhsil müəssisələrinə müəllimlərin işə qəbulu (MİQ) müsabiqəsinin elektron sənəd qəbulu mərhələsi başlayıb.
Elektron sənəd qəbulu iyunun 3-dən 10-dək davam edib.
Müəllimlərin işə qəbulu üzrə test imtahanlarının iyulun 1-8-də keçirilməsi planlaşdırılır.
Test imtahanından sonra vakansiya seçimi mərhələsi keçiriləcək. Son mərhələdə isə müəllim olmaq istəyən namizədlər müsahibədə iştirak edəcəklər.
AzEdu.az-ın “Təhsil haqqında” qanundan əldə etdiyi məlumata görə, vakant vəzifələr üzrə seçim edən namizədlər müsahibə mərhələsinə buraxılır.
Qanuna əsasən, müsahibələrin keçirilməsi məqsədilə hər il müvafiq komissiyalar yaradılır.
Komissiyaların tərkibi Nazirlik tərəfindən təsdiq edilir və təhsil müəssisəsinin rəhbəri, metodist və psixoloqdan ibarət olur.
Müsahibə zamanı namizədlərin ümumi dünyagörüşü, peşə keyfiyyətləri və psixoloji hazırlığı komissiya tərəfindən qiymətləndirilir. Yekunda namizədin müəllim vəzifəsinə uyğun olub-olmaması barədə qərar qəbul edilir.
Müsahibənin nəticələri keçirildiyi tarixdən etibarən 5 iş günü ərzində namizədlərin “Şəxsi kabinet”inə göndərilir.
Qeyd edək ki, test imtahanında və ya müsahibədə iştirak etməyən namizədlər üçün təkrar imtahan və ya təkrar müsahibə təşkil edilmir.
