Bakı Mühəndislik Universitetinin (BMU) Qida və biotexnologiya kafedrasının müdiri Rəvan Rəhimov, Texnoparkın əməkdaşı Nərmin İsmayılova və BMU məzunu, eyni zamanda İtaliyanın Padova Universitetinin magistri Aynurə Məmmədovanın rəhbərlik etdiyi “Təmiz Xəzər” ekoloji innovasiya startap layihəsi beynəlxalq dəstək qazanıb.
AzEdu.az xəbər verir ki, beynəlxalq əmtəə ticarəti şirkəti “ Alkagesta ” dəniz mühitində neft çirklənməsinin lokallaşdırılması və neytrallaşdırılması üçün qabaqcıl həllərin hazırlanmasına yönəlmiş elmi əsaslı ekoloji təşəbbüs olan bu layihəyə maliyyə ayırıb. Layihə “Alkagesta” komandasının diqqətinə GUB Startup Platforması vasitəsilə çatdırılıb və burada “Gələcək üçün Bacarıqlar” təşəbbüsünün bir hissəsi kimi təqdim olunub. Layihənin elmi potensialı, ekoloji əhəmiyyət, Qafqaz və Mərkəzi Asiya regionunda gənclər arasında sahibkarlıq ruhunun inkişafına töhfəsi qiymətləndirildikdən sonra “Alkagesta” bu təşəbbüsü özünün geniş ESG strategiyası və regionda tətbiqini elmin uzunmüddətli inkişafına yönəlmiş investisiya siyasətinin bir hissəsi olaraq dəstəkləmək qərarı verib.
“Alkagesta” “Təmiz Xəzər” təşəbbüsünə yatırdığı investisiya vasitəsilə yalnız ekoloji innovasiyanı deyil, həm də regional və qlobal əhəmiyyət daşıyan praktik texnologiyalar hazırlayan gənc alim və tədqiqatçıların sahibkarlıq ruhunu dəstəklədiyini bildirib. Bu təşəbbüs Alkagesta-nın məsuliyyətli ekoloji yanaşma,texnoloji inkişaf və Qafqaz və Mərkəzi Asiya regionunda sahibkarlıq potensialının formalaşdırılması istiqamətində uzunmüddətli ESG baxışını əks etdirir. “Regionun gənc tədqiqatçılarının nümayiş etdirdiyi sahibkarlıq ruhu və elmi ambisiya təqdirəlayiq hesab olunur. Qafqaz və Mərkəzi Asiyadan bu səviyyədə istedad və məqsədyönlülüyün ortaya çıxmasını görmək bizi qürurlandırır, həmçinin ‘Təmiz Xəzər’ kimi təşəbbüslərin yanında olmaqdan məmnunluq duyuruq. Bu, gənc innovatorların dəstəklənməsi, yalnız ekoloji tərəqqiyə deyil, həm də regionun gələcəyini formalaşdıracaq yeni nəsil alim və sahibkarların inkişafına yatırılan investisiyadır”,-deyə Alkagesta-nın Baş İcraçı Direktoru Orxan Rüstəmov vurğulayıb.
BMU əməkdaşlarının layihəsi Xəzər regionunda karbohidrogenlərin hasilatı və daşınması ilə əlaqəli ən ciddi ekoloji risklərdən biri olan neft çirklənməsinin qarşısının alınmasına yönəlib. Neft sızmaları və su səthində yaranan emulsiyalaşmış karbohidrogen qatları oksigen mübadiləsini ciddi şəkildə poza,dəniz biomüxtəlifliyinə zərər verə və sahilyanı icmalara mənfi təsir göstərə bilər.
“Təmiz Xəzər” layihəsinin komandası isə bu problemlərin həlli üçün genişmiqyaslı tətbiq imkanı olan, aşağı maliyyə tələb edən elmi həllər üzərində çalışır. Layihə neft sızmalarına qarşı cavab tədbirlərinin sürətini və effektivliyini artırmaq məqsədilə ekoloji baxımdan təhlükəsiz və iqtisadi cəhətdən səmərəli koaqulyantların və neft lokallaşdırma materiallarının hazırlanmasına fokuslanıb. Hazırkı tədqiqat istiqamətlərinə biodeqradasiya olunan sorbentlər, nanomaterial əsaslı neft toplama vasitələri, həmçinin bum baryerləri və skimmer texnologiyaları kimi qabaqcıl saxlama sistemləri daxildir.
Layihənin ən perspektivli nəticələrindən biri müxtəlif ekoloji şəraitlərdə yüksək dərəcədə çirklənmiş suyun təmizlənməsinə imkan verən yeni kimyəvi məhlulun hazırlanmasıdır. İlkin laboratoriya nəticələri göstərir ki, maddənin cəmi dörd qramı bir ton çirklənmiş suyun son dərəcə aşağı istehsal xərcləri ilə təmizlənməsi üçün kifayətdir. Bu isə layihənin genişmiqyaslı tətbiq və sənaye potensialının yüksək olduğunu göstərir. Elmi tədqiqatlar artıq iki aydan çoxdur davam edir və ilkin nəticələr praktik baxımdan uğurludur. Hazırda əsas diqqət reagent sintezinin optimallaşdırılması və müxtəlif texniki, ekoloji şəraitlərdə əməliyyat performansının qiymətləndirilməsinə yönəlib.
