“US News” nəşri dünyanın ən yaxşı universitetlərinin reytinqini hazırlayıb.

AzEdu.az xəbər verir ki, dünyanın 60-da çox ölkəsinin ali təhsil ocaqlarının daxil edildiyi reytinq cədvəlinə 100 balla ABŞ-ın Harvard Universiteti başçılıq edir.

Ardınca siyahıda 97,6 balla Massaçusets Texnologiya İnstitutu gəlir. İlk üçlüyü 93,8 balla daha bir ABŞ ali təhsil ocağı – Stenford Universiteti tamamlayır. 

İngiltərənin dünya şöhrətli Oksford Universiteti 87,6 balla beşinci, Kembric Universiteti isə (85,8 balla) yeddinci yerdə qərarlaşıb.

Reytinq cədvəli hazırlanarkən 13 meyar, o cümlədən, təhsil ocaqlarının akademik nailiyyətləri və onların qlobal və ya regional nüfuzu nəzərə alınıb.

Siyahıda ümumilikdə 1250 universitet yer alır. Türkiyədən siyahıya (ümumilikdə 27) Boğaziçi Universiteti (234-cü), İstanbul Texniki Universiteti  (367-ci), Ankara Universiteti (597-ci), İstanbul Universiteti (663-cü) və digər nüfuzlu ali təhsil ocaqları daxil edilib. 

Şimal qonşumuz Rusiyanın isə 14 universiteti reytinqdə yer alır. Ən yüksək göstəricisi olan M.V.Lomonosov adına Moskva Dövlət Universiteti 275-ci pillədə göstərilib.

Gürcüstandan siyahıya İvan Cavakaşvili adına Tbilisi Dövlət Universiteti düşüb (48,7 bal, 435-ci yer).(Oxu.az)