Mingəçevir Dövlət Universitetinin (MDU) rektoru Şahin Bayramov Avropa Komissiyasının “Erasmus+” proqramı çərçivəsində İspaniya Krallığının Vallodolid Universitetində təhsil almaq hüququ qazanmış tələbələrlə görüşüb.

AzEdu.az xəbər verir ki, hazırda beynəlxalq tələbə və müəllim mübadiləsinin xüsusi önəm daşıdığını vurğulayan Ş.Bayramov MDU-da xarici universitetlərlə əməkdaşlığın inkişafına xüsusi diqqət yetirildiyini bildirib.

Ş.Bayramov 2019/2020-ci tədris ilinin yaz semestrində İspaniyada akademik mübadilədə iştirak edəcək Zaur Məmmədovu, Aidə Qurbanovanı və Ülvi Aşurovu təbrik edib. O, tələbələrə “Erasmus+” proqramı çərçivəsində təqdim olunan imkanlardan maksimum faydalanmaqlarını tövsiyə edib. Ş.Bayramov xaricdə təhsil müddətində yüksək akademik nailiyyətlər əldə etməklə yanaşı, ölkəmizi layiqincə təmsil etməyin vacibliyini vurğulayıb.

İspaniyaya gedən tələbələrin arzu və istəklərini dinləyən rektor onlara uğurlar arzulayıb, xaricdə olduqları müddətdə MDU ilə daim əlaqə saxlamalarını tövsiyə edib.

Avropada təhsil almaq üçün yaradılan şəraitə görə təşəkkürlərini bildirən tələbələr Vallodolid Universitetində yüksək akademik göstəricilər əldə etməklə MDU-nu layiqincə təmsil edəcəklərinə söz veriblər.

Qeyd edək ki, MDU-nun digər iki tələbəsi 2019/2020-ci tədris ilinin payız semestrində İspaniyanın həmin universitetində akademik mübadilədə iştirak ediblər.