Dünyanın ilk fərdiləşdirilmiş mRNT əsaslı xərçəng peyvəndi klinik sınaqların III mərhələsində uğurlu nəticə göstərib. Peyvənd dəri xərçənginin bir növü olan melanomanın təkrarlanma və ya ölüm riskini 42 faiz azaldıb.
AzEdu.az xarici mediaya istinadən xəbər verir ki, “Moderna” və “Merck” şirkətləri tərəfindən hazırlanan peyvənd cərrahi əməliyyatdan sonra melanomanın yenidən yaranmasının qarşısını almaq məqsədi daşıyır.
Tədqiqatın beynəlxalq rəhbəri, Avstraliya Melanoma İnstitutunun tibbi onkoloqu Corcina Lonq nəticələri 2026-cı ildə Avropa Tibbi Onkologiya Cəmiyyətinin Konqresində təqdim edib.
Klinik sınaqlarda dünyanın 157 tibb mərkəzindən 1 100-dən çox pasiyent iştirak edib. Nəticələrə görə, peyvəndin mövcud immunoterapiya preparatı pembrolizumab ilə birlikdə istifadəsi yalnız həmin preparatın tətbiqi ilə müqayisədə daha effektiv olub.
Fərdiləşdirilmiş peyvənd hər bir pasiyentin şişinin genetik xüsusiyyətləri əsasında hazırlanır. Bu yanaşma immun sisteminə xərçəng hüceyrələrini tanımağa və onlara hücum etməyə kömək edir.
Tədqiqatçılar hesab edirlər ki, bu nəticələr xərçəngin müalicəsində fərdiləşdirilmiş yanaşmanın imkanlarını genişləndirə bilər. Texnologiyanın digər xərçəng növlərinin müalicəsində tətbiqi də araşdırılır.
Bununla belə, peyvənd hələlik pasiyentlər üçün geniş istifadəyə təqdim edilməyib. Onun tətbiqinə başlanması üçün müvafiq tənzimləyici qiymətləndirmə prosesinin tamamlanması tələb olunur.
