Tam (11 illik) orta təhsil səviyyəsi üzrə 2026-cı il 9 və 15 mart tarixlərində keçirilmiş buraxılış imtahanlarının nəticələri elan olunduqdan sonra minlərlə abituriyent nəticəsindən narazı qaldığı üçün apellyasiyaya müraciət edib.
Belə ki, 9 mart buraxılış imtahanı üzrə 3509, 15 mart imtahanı üzrə isə 3978 nəfər Apellyasiya Komissiyasına müraciət edib.
Həmin abituriyentlər nəticələrin nə zaman açıqlanacağı ilə bağlı maraqlanırlar.
AzEdu.az-ın Dövlət İmtahan Mərkəzindən (DİM) əldə etdiyi məlumata görə, proses başa çatdıqdan sonra abituriyentlərə "SMS" göndəriləcək.
Bildirilib ki, apellyasiya prosesi aşağıdakı ardıcıllıqla aparılır:
Apellyasiya Komissiyası tərəfindən müraciət olunan bütün işlər araşdırılır;
Şagirdlərin müraciət etdikləri tapşırıqlar üzrə ekspert rəyi (yazılı şəkildə) apellyasiya ərizələrinə əlavə edilir;
Şagirdlərin apellyasiya ərizələrində qeyd etdikləri telefon nömrələrinə apellyasiya prosesinin başa çatması ilə bağlı SMS göndərilir.
