XƏBƏRLƏR

23.01.2020 15:51
AMEA ilə TÜBİTAK-ın birgə elan etdiyi müsabiqəyə dair maarifləndirici seminar

Yanvarın 23-də Azərbaycan Milli Elmlər Akademiyasında (AMEA) AMEA ilə Türkiyə Elmi və Texnoloji Tədqiqat Şurası (TÜBİTAK) arasında imzalanmış əməkdaşlıq sazişi üzrə müştərək proqram çərçivəsində elan olunan müsabiqəyə dair məlumatlandırma seminarı keçirilib.

AzEdu.az xəbər verir ki, seminarda akademiyanın Rəyasət Heyəti aparatının Beynəlxalq əlaqələr idarəsinin rəisi, dosent Esmira Əlirzayeva 1963-cü ildən fəaliyyət göstərən TÜBİTAK-ın dünyanın aparıcı təşkilatları və universitetləri ilə birgə mütəmadi olaraq layihələr həyata keçirdiyini söyləyib. O, AMEA ilə TÜBİTAK tərəfindən artıq üçüncü müsabiqənin elan olunduğunu, bu dəfə akademiya ilə yanaşı, həmçinin respublikanın digər elmi-tədqiqat mərkəzləri və təhsil müəssisələrindən də layihələrin qəbul ediləcəyini vurğulayıb.

Müsabiqənin martın 6-dək qüvvədə olduğunu xatırladan E.Əlirzayeva layihə təkliflərinin Türkiyə və Azərbaycandan tərəfdaş qruplar tərəfindən birlikdə ingilis dilində hazırlanmasının zəruriliyinə toxunub, layihənin prioritet sahəni və hər iki ölkə üçün aktual mövzunu əhatə etməli olduğunu bildirib. Qeyd edib ki, mövzunun adının seçilməsinə, eləcə də ərizə forması doldurulan zaman texniki şərtlərə (sənədlər, imzalar və s.) xüsusi diqqət yetirilməlidir. O, qəbul olunan layihələrin texniki baxışdan keçdikdən sonra 4 kateqoriya üzrə qiymətləndirilmə üçün beynəlxalq ekspertlərə göndəriləcəyini və ən yüksək orta bal toplayan 3 layihəyə dəstək veriləcəyini deyib.

İdarə rəisi daha sonra ərizə formasının doldurulma qaydasını göstərib, iştirakçıların suallarını cavablandırıb.

Sonda Avropa Komissiyasının Tədqiqat və İnnovasiya Proqramı (“Horizon 2020”) üzrə Milli əlaqələndirici şəxsləri Tofiq Babayev və Rövşən Kərimov azərbaycanlı alim və mütəxəssislərin proqramda iştirakının gücləndirilməsi məqsədilə fikirlərini bölüşüblər.

Tədbirdə akademiyanın elmi müəssisə və təşkilatlarının beynəlxalq əlaqələr şöbələrinin məsul şəxsləri, akademiyanın gənc alimləri, eləcə də respublikanın ali təhsil və elmi-tədqiqat mərkəzlərinin nümayəndələri iştirak ediblər.