https://www.zirve.edu.az/
21.03.2018 09:33
“Qəzada ağır yaralanan müəllimənin vəziyyətində müsbətə doğru irəliləyiş var”- Həkimdən açıqlama
Yevlaxda baş verən qəzadan sonra Respublika Neyrocərrahiyyə Klinikasında əməliyyat olunan məktəb əməkdaşı Əntiqə Qoşqarlının səhhətində müsbətə doğru irəliləyiş var.
 
Bunu AzEDU-ya açıqlamasında Respublika Neyrocərrahiyyə Xəstəxanasının həkim cərrahı Azər Zeynalov bildirib. O qeyd edib ki, xəstə reanimasiya şöbəsində ciddi nəzarətdə saxlanılır:
“Əntiqə Qoşqarlının vəziyyəti yavaş-yavaş yaxşıya doğru gedir. Komadan ayılmaq istəyir, amma bunun üçün bir qədər zaman lazımdır. Komadan nə zaman ayılacağını söyləmək isə mümkün deyil. Çünki təbabətdə ikini ikiyə vuranda dörd yox,  səkkiz və ya 16 edir”.
 
Qeyd edək ki,  martın 11-də respublikanın 27 şəhər və rayonunda ümumtəhsil müəssisələrinin məzunları üçün ümumorta təhsil səviyyəsi üzrə (9-cu sinif) buraxılış imtahanında iştirak etmək üçün Yevlax rayonu Aran qəsəbə 1 nömrəli tam orta məktəbinin 15 şagirdi, 1 direktor müavini və 1 nəfər məktəbin əməkdaşından ibarət heyəti aparan mikroavtobus qəzaya uğrayıb. Ağır yaralanan 1992-ci il təvəllüdlü Əntiqə Qoşqarlı travma mənşəli beyindaxili qansızma diaqnozu ilə martın 13-də Bakıya göndərilərək, təcili əməliyyata götürülüb.
 
Nəzrin Rüstəmova