https://www.zirve.edu.az/
19.03.2018 09:05
Rayon Təhsil Şöbəsinin müdiri deputatın iradlarını təsdiqlədi: “Müəllimlərə ciddi ehtiyacımız var”

Nazirlər Kabinetinin 2017-ci ildəki fəaliyyəti haqqında hesabatının müzakirəsi zamanı deputat Tahir Kərimli Ağsu rayonunda 106 müəllim çatışmadığını bildirib.

Məsələ ilə bağlı Ağsu Rayon Təhsil Şöbəsinin müdiri Səftər Əlövsətov AzEDU.az-a açıqlamasında Tahir Kərimlinin dediklərini təsdiqləyib:

“Ötən il müəllimlik üçün 220 vakant yer ayrılmışdı. Onlardan 115 nəfəri müəllim kimi işə qəbul edildi. 105 yer isə hələ də boşdur. Ağsu rayonunda müəllimlərə ehtiyac var. Yəqin ki, bu il vakant yerlərin sayı bir qədər də artacaq”.

Qeyd edək ki, deputat çıxışı zamanı Ağsuda təhsil almağın mümkün olmadığı məktəblərin mövcudluğunu, hətta bəzi orta təhsil müəssisələrində ilanlar göründüyünü vurğulayıb.

Nəzrin Rüstəmova