https://modern.az/ http://www.position.az/
2022-08-17 11:30:00
Fazil Mustafa: "Məktəbli formaları bir neçə məmurun sexində istehsal olunur..."

“Bu gün əksər vətəndaşların məktəblə birbaşa əlaqəsi var. Onların da ən yaralı yeri dərsliklər və məktəbli paltarıdır. Heç nəyi gizlətmək lazım deyil, həm dərslik nəşri, həm də məktəbli paltarı ayrı-ayrı imtiyazlı şəxslərin inhisarındadır. Ona görə də hər vasitə ilə min hoqqa çıxarırlar ki, vətəndaşdan pul qoparsınlar. Dərslik pulsuz verilir, nə olsun? Üzərində on-on beş yardımçı kitabı da almalısan ki, kimlərsə pul qazansın? Əlavə məcburən yalnız yükü olub məzmunu olmayan bu qədər kitab aldırarlar? Üstəlik də bu dərslikləri niyə may ayında yığırsınız? Bəlkə uşaq 3 ay ərzində həmin kitabları təkrar edəcək? Onsuz da dərslər mənasız yerə sentyabrın 15-i başlayır, yəni kitabları sentyabrın 1-də yığsanız dünya dağılar?”

AzEdu.az xəbər verir ki, bu barədə Milli Məclisin deputatı Fazil Mustafa feysbuk hesabında paylaşım edib.

Deputat qeyd edib ki, əksər vətəndaşlar övladlarının təhsil alması naminə kitab-dəftərlərə pulu boğazından kəsib ödəyirlər:

 

“Məktəbli forması isə başdan-ayağa hoqqabazlıqdır. Bir neçə məmurun sexində istehsal olunur, üzərinə də istədikləri qiyməti yapışdırırlar. Hamı tökülüb inhisarçıdan baha qiymətə forma almağa. Unutmayaq ki, bu forma çox uşaq üçün bir il işə yarayır. Təhsilin keyfiyyətinə diqqət yetirmək lazım, formasına deyil. Təklifim budur ki, müvafiq icra hakimiyyəti məktəbli qızlar və oğlanlar üçün ən azı 10 çeşid alternativ geyim formaları təqdim etsin. Qoy bir məktəbdə on çeşid bir-birinə yaxın forma olsun, təki valideyn onu rahat əldə etsin. Hələ bir neçə uşağı məktəbə gedən valideynlərin halını burada təsvir etmirəm. Bəlkə elə valideyn var ki, forma almağa imkanı yoxdur, özü evdə tikib uşağa versin. Bütün hallarda alternativ çox olanda qiymət də münasib olur. Əslində dövlət formanı pulsuz təmin etmənin yollarını tapsa yaxşı olardı. Yüz yerdə mənasız israfımız var, təhsildən hər yayındırılan vəsait küçədə bir cahilin, bir narkomanın sayının artması deməkdir. Bu ölkə onsuz da cahilliyə məğlub olmağa doğru gedir...”