Azedu.az
https://modern.az/ https://www.instagram.com/apak.az/
2022-05-21 16:54:00
Əməkdaşlığa dair Anlaşma Memorandumu imzalandı  

Mələk investorları bir araya gətirən “Technovate Mələk İnvestorlar Klubu” ilə “SABAH.lab” Akselerasiya Mərkəzi arasında Əməkdaşlığa dair Anlaşma Memorandumu imzalanıb. 

 

AzEdu.az xəbər verir ki, tərəflər olaraq “SABAH.lab” Akselerasiya Mərkəzinin Baş icraçı direktoru Rəhim Bayramlı və “Technovate Mələk İnvestorlar Klubu”nun rəhbəri Orxan Bağırov çıxış ediblər. 

 

Əməkdaşlığın ilk addımı kimi sözügedən klubun adının  “Technovate-Sabah Mələk İnvestorlar Klubu” olaraq dəyişdirilməsinə qərar verilib.

 

Qeyd edək ki, “SABAH.lab” Azərbaycan Respublikası Təhsil Nazirliyi və ARTİ-nin birgə təşəbbüsü ilə yaradılan və fəaliyyət göstərən startap akselerasiya mərkəzidir. 

 

Mərkəzin əsas məqsədi ölkədə dayanıqlı startap ekosistemi yaradaraq iqtisadi inkişafa töhfə verməkdir. Bu məqsədi gerçəkləşdirmək üçün “SABAH.lab” hal-hazırda 2 akselerasiya proqramı həyata keçirir və 21 rezident komanda bu proqramların üzvüdür.

 

Technovate Mələk İnvestorlar Klubu isə yerli investorları bir araya gətirərək investorlar şəbəkəsini genişləndirmək məqsədilə təsis edilib. Buraya 10.000-50.000 ABŞ Dolları arası yatırım etməyə hazır olan investorlar cəlb olunur və əsasən yerli startaplar ilkin mərhələlərdə yatırım etmək imkanı əldə edirlər. 

 

Qeyd edək ki, “Technovate Mələk İnvestorlar Klubu”nun digər həmtəsisçisi Fərid İsmayılzadədir.
Fərid İsmayılzadə həm də “Golden Pay” və “Hesab.az” startaplarının qurucusudur.

 

“SABAH.lab”ın əsas məqsədlərindən biri regionun başlıca innovasiya mərkəzinə çevrilmək olduğundan nəzərdə tutulan əməkdaşlıq bu məqsədin gerçəkləşməsi üçün önəmli bir addımdır. Tərəfdaşlıq əsasında qarşılıqlı şəkildə resurs və bilik mübadiləsi təmin olunacaq. Qeyd edək ki, klubun əsas missiyası yerli investorları yerli startaplara düzgün şəkildə cəlb etməkdir. Beləliklə, həm startaplar ilkin mərhələlərində daha da inkişaf etmək imkanlarını artıracaq, həm də investorlar ilkin mərhələdə startaplara yatırım etmək şansı əldə edəcək. Buna görə də yatırım etməyə maraqlı potensial investorlara düzgün investisiya strategiyası çatdırılması məqsədilə kurslar və təlimlər təşkil olunması nəzərdə tutulub. Nəticədə yatırım etmək istəyən investorların riskləri azalmış olacaq. Digər addımlar isə Azərbaycanda vençur ekosisteminin təmin olunması və inkişaf etdirilməsi ilə bağlı birgə əməkdaşlıq işləri, Bakıda və regionda ekosistemin inkişafı, təbliğini özündə əks etdirən birgə tədbirlərin təşkilidir. Bu tədbirlər investorlar şəbəkəsinin genişlənməsini və yerli startapların imkanlarını daha da artıracaq. 

 

Bu klubun üzvü olmaq və ilkin mərhələdə olan startaplara yatırım etmək şansı əldə etmək istəyirsinizsə, http://technovate-sabah-angels.com saytı vasitəsilə qeydiyyatdan keçməyə tələsin. 

 

Son müraciət tarixi-31 may.