AzEdu.az xəbər verir ki, yeni araşdırma süni intellekt modellərinin birgə işlədikləri zaman özlərinə məxsus yeni ünsiyyət forması yaratmağa başladıqlarını ortaya qoyub.
Nyu-Yorkda yerləşən süni intellekt laboratoriyasının tədqiqatçıları müəyyən ediblər ki, müxtəlif şirkətlərə məxsus süni intellekt modelləri əməkdaşlıq etdikcə onlara öyrədilməmiş yeni ifadələr, qısaltmalar və xüsusi mənalar formalaşdırırlar.
Araşdırmaya görə, bu modellərin istifadə etdiyi dil zaman keçdikcə daha mürəkkəb və insanlar üçün daha çətin anlaşılan hala gəlir. Bəzi hallarda süni intellektlər müəyyən anlayışları ifadə etmək üçün yalnız özlərinin başa düşdüyü kodlaşdırılmış söz və ifadələrdən istifadə edirlər.
Mütəxəssislər hesab edirlər ki, belə ünsiyyət forması məlumat mübadiləsini daha sürətli və səmərəli etmək məqsədi daşıya bilər. Bununla yanaşı, süni intellekt sistemlərinin fəaliyyətinin izlənilməsi və yoxlanılması baxımından yeni risklər yarana bilər.
Araşdırma müəllifləri vurğulayırlar ki, süni intellektlərin öz aralarında getdikcə daha mürəkkəb ünsiyyət qurması onların fəaliyyətinə insan nəzarətini çətinləşdirə və təhlükəsizliklə bağlı əlavə suallar yarada bilər.
