İstanbul Texniki Universitetinin (İTÜ) Azərbaycanın Qarabağ Universitetində akademik bölmələr yaratması ilə bağlı qərar qəbul edilib. Qərar 27 avqust 2026-cı ildə Türkiyənin “Resmi Gazete” nəşrində dərc olunub.
AzEdu.az xarici mediaya istinadən xəbər verir ki, Türkiyənin Yüksəköğretim Kurulu (YÖK) məlumatına görə, bu addım Türkiyə-Azərbaycan ali təhsil əməkdaşlığının genişləndirilməsi çərçivəsində atılıb. İTÜ ilə Qarabağ Universiteti arasında əməkdaşlıq haqqında memorandum isə 21 yanvar 2026-cı ildə imzalanıb.
Razılaşma bakalavriat, magistratura və doktorantura səviyyələrində əməkdaşlığı, tələbə və müəllim mübadiləsini, birgə elmi-tədqiqat layihələrini, ikili diplom proqramlarını və mühəndislik sahəsində ortaq laboratoriyaların yaradılmasını əhatə edir.
İTÜ-nün xüsusilə mühəndislik sahəsindəki təcrübəsinin Qarabağ Universitetinə ötürülməsi nəzərdə tutulur. Anadolu Ajansının məlumatına görə, universitetdə Kimya mühəndisliyi, Maşın mühəndisliyi, İnşaat mühəndisliyi və Elektrik-elektronika mühəndisliyi istiqamətlərində akademik bölmələrin yaradılması gözlənilir. Bununla belə, konkret akademik strukturların və proqramların detalları növbəti mərhələdə müəyyənləşdiriləcək.
YÖK sədri Erol Özvar bildirib ki, İTÜ-nün mühəndislik sahəsindəki elmi potensialının Qarabağ Universiteti ilə birləşdirilməsi bölgənin yenidən qurulmasına elm, texnologiya və ixtisaslı kadrlar vasitəsilə töhfə vermək məqsədi daşıyır.
Fidan Şahkərəmova
