Rusiyada ali təhsil sistemi 2026–2027-ci illərdən etibarən yeni modelə keçiriləcək və bu model tələbə hazırlığının müddətini ixtisasdan asılı olaraq fərqli şəkildə tənzimləyəcək.
AzEdu.az xarici KİV-ə istinadən xəbər verir ki, mühəndislik, tibb və pedaqogika sahələri üzrə təhsil 5 ilə qədər uzadılacaq, turizm, xidmət və bəzi İT ixtisaslarında təhsil müddəti 4 il olaraq saxlanılacaq, yüksək texnologiyalar, aerokosmik sənaye və biotexnologiya kimi strateji istiqamətlərdə isə 6 illik proqramlar tətbiq olunacaq. Bu dəyişikliklərlə hökumət hər sahənin peşə tələblərinə uyğun daha dərin və praktiki hazırlıq təmin etməyi planlaşdırır.
Ən mühüm yeniliklərdən biri magistraturanın əvvəlki formatdan çıxarılaraq üç yeni istiqamətə bölünməsidir: peşə-sahəvi magistratura tələbələri konkret sahədə yüksək ixtisaslı mütəxəssis kimi yetişdirməyi hədəfləyir, idarəetmə yönümlü magistratura liderlik və təşkilati bacarıqların inkişafına fokuslanır, elmi-tədqiqat istiqaməti isə PhD tipli elmi fəaliyyət və tədqiqat hazırlığını əsas götürür. Bu yanaşma magistraturanı daha məqsədyönlü və ixtisaslaşmış bir mərhələyə çevirir.
Eyni zamanda, klassik “bakalavr + magistratura” modeli tədricən aradan qaldırılaraq birpilləli dərin ixtisaslaşma sisteminə keçid planlaşdırılır ki, bu da sovet dövrünün “ixtisaslı mütəxəssis” modelinə qayıdış kimi qiymətləndirilir. Hökumət bu islahatlarla həm kadr çatışmazlığını aradan qaldırmağı, həm də əmək bazarının real ehtiyaclarına uyğun daha hazırlıqlı mütəxəssislər yetişdirməyi hədəfləyir.
