Verilən qərara əsasən 15 fevraldan etibarən ali təhsil müəssisələrində praktiki məşğələlər tələb olunan ixtisaslar üzrə dərslər ənənəvi formada bərpa olunur.
Təhsilalanların fiziki iştirakını tələb edən fənlərin və mövzuların əvvəlcədən müəyyən edilmiş cədvəllər üzrə tədrisi tibb, yaradıcılıq, mühəndislik və s. ixtisaslar üzrə ənənəvi formada bərpa olunacaq.
Buna baxmayaraq ölkədə yuxarıda qeyd edilmiş ixtisaslar üzrə əsas kadr yetişdirən BANM, ADNSU, AzTU və BMU kimi universitetlərdə tədris onlayn olaraq davam etdiriləcək.
Bəs universitetlərin tədrisi onlayn formada davam etdirməsini zəruri edən amillər nələrdir?
AzEdu.az bu mövzu ilə bağlı mətbuat katiblərinin cavablarını təqdim edir:
Azərbaycan Texniki Universitetinin mətbuat katibi Sevinc İsgəndərova :
“Azərbaycan Texniki Universitetində tədris və tədris və təlim - tərbiyə prosesi Nazirlər Kabinetinin 10 sentyabr 2020 - ci il tarixli 332 nömrəli qərarı ilə təsdiq edilmiş “Xüsusi karantin rejimi dövründə Azərbaycan Respublikasında fəaliyyət göstərən təhsil müəssisələrində tədris və təlim-tərbiyə prosesinin təşkilinin müvəqqəti Qaydaları” na uyğun olaraq həyata keçirilir. Fevralın 15 - dən AzTU - da tədris onlayn formada davam edir. Tədris proqramının tələbləri nəzərə alınmaqla bəzi ixtisaslar üzrə virtual laboratoriyalar təşkil olunacaq”.
Bakı Ali Neft Məktəbinin İctimaiyyətlə əlaqələr şöbəsinin müdiri Zamirə Ədilova:
“Məlum olduğu kimi, Təhsil Nazirliyinin yeni qərarına əsasən, 16 fevraldan ali və orta ixtisas, eləcə də peşə təhsil müəssisələrində praktiki məşğələlər tələb olunan ixtisaslar üzrə və fiziki iştirak tələb edən fənlər və ixtisasların əvvəlcədən müəyyən olunmuş cədvəl üzrə tədrisi (yaradıcılıq, tibb və mühəndislik) ənənəvi formada bərpa olunması nəzərdə tutulub. Praktiki məşğələlər tələb olunan mühəndislik ixtisasları üzrə ciddi zərurət yaranarsa dərslərin ənənəvi formada davam etdirilməsi tövsiyə olunurdu.
Rayondan gələn tələbələrin vəziyyəti də nəzərə alındı
Tələbə, professor - müəllim heyəti ilə aparılan müzakirələrin nəticəsi və Elmi Şuranın qərarı ilə, Bakı Ali Neft Məktəbində dərslərin bir müddət distant aparılması qərara alınıb. Buna səbəb kimi, praktiki məşğələlər tələb olunan fənlər və laboratoriya dərsləri video formatda metodiki vəsaitlərin və virtual laboratoriyaların təşkil edilməsi yolu ilə aparılır. Dərslərin gedişatının pozulmaması, pandemiya şəraitində rayondan gələn tələbələrin karantin rejiminin tələbələrinə uyğun olaraq yataqxana ilə təminatında yaranacaq məsələləri nəzərə alaraq dərslərin onlayn rejimdə davam etdirilməsi məqsədəuyğun sayılıb.”
Azərbaycan Dövlət Neft və Sənaye Universitetinin İctimaiyyətlə Əlaqələr və Marketinq Departamentinin direktoru Bəhruz Nəzərov:
“ADNSU-da tədris ili onlayn formada davam etdiriləcək. Biz ölkədə hazırki karantin rejimi dövründə tədrisin ənənəvi formada qismən bərpası məsələsini nəzərdən keçiririk. Bu həm laboratoriya məşğələlərinin qismən bərpası, həm də son kurslarda istehsalat təcrübələrinin təşkili məsələsidir. Eyni zamanda son kurs bakalavrlar, magistratura üzrə təhsil alanlar və bununla yanaşı birinci kursların universitetə müəyyən qrafiklər əsasında gəlməsi məsələsi nəzərdən keçirilir. Azərbaycan Dövlət Neft və Sənaye Universitetinin rektoru, professor Mustafa Babanlı bu məsələlərlə bağlı açıq mikrofon keçirəcək. Son nəticə olaraq tədirisn ənənəvi formada qismən bərpasının hansı formada həyata keçiriləcəyi ilə bağlı məlumat veriləcək”.
Qeyd edək ki, Təshil Nazirliyinin məlumatına əsasən, son kursların təcrübə mərhələsinin həyata keçirilməsi nəzərdə tutulur.
kitabı