Astronomlar Vera C. Rubin Rəsədxanasının ilkin məlumatlarından istifadə etməklə Süd Yolunun kənarlarında yerləşən yeni, olduqca zəif peyk qalaktika aşkar ediblər. Aquarius IV adlandırılan bu obyekt rəsədxananın məlumatları əsasında müəyyən edilən ilk ultra-zəif Süd Yolu peyk qalaktikasıdır.
AzEdu.az xarici mediaya istinadən xəbər verir ki, Aquarius IV Yerdən təxminən 355 min işıq ili uzaqlıqda, Süd Yolunun xarici halqasında yerləşir. Alimlər onun çox zəif işıq saçdığını və qədim ulduzlardan ibarət olduğunu müəyyənləşdiriblər. Araşdırmaya görə, qalaktikadakı ulduzların yaşı təxminən 13 milyard il ola bilər.
Tədqiqatçılar yeni obyekti Rubin Rəsədxanasının ilkin məlumatlarında müəyyən etdikdən sonra onun mövcudluğunu Çilidə yerləşən başqa astronomik kameranın arxiv görüntüləri ilə də təsdiqləyiblər. Bununla belə, alimlər Aquarius IV-ün həqiqətən ultra-zəif cırtdan qalaktika, yoxsa qeyri-adi xüsusiyyətlərə malik kürəvi ulduz topası olduğunu dəqiqləşdirmək üçün əlavə müşahidələrə ehtiyac olduğunu bildirirlər.
Alimlərin fikrincə, bu kəşf Rubin Rəsədxanasının hələ fəaliyyətinin ilkin mərhələsində belə çox zəif kosmik obyektləri aşkar edə bildiyini göstərir. Tədqiqatçılar gələcək müşahidələr zamanı Süd Yolunun ətrafında daha çox kiçik və zəif qalaktikanın aşkarlanacağını gözləyirlər.
Fidan Şahkərəmova
