https://www.zirve.edu.az/
13.01.2019 12:56
Dövlət qulluğu üzrə 150 namizədlə 234 müsahibə keçiriləcək

Dövlət qulluğu üzrə 27 noyabr 2018-ci ildə elan olunan müsabiqənin müsahibə mərhələsinin keçirilmə qrafiki müəyyən edilib.

AzEdu.az xəbər verir ki, müsahibələrin 14-28 yanvar 2019-cu il tarixləri ərzində keçirilməsi nəzərdə tutulur.

Elan üzrə 11 dövlət orqanında mövcud olan inzibati dövlət qulluğu vəzifələrinə aid 66 (A növü üzrə 2 vəzifə, B növü üzrə 64 vəzifə) vakant vəzifə müsahibəyə çıxarılıb. Elana çıxarılan vəzifələr üzrə qeydiyyatdan keçən 150 namizədlə 234 müsahibənin keçirilməsi planlaşdırılır.

Ən yüksək müsabiqə vəziyyəti Vətəndaşlara Xidmət və Sosial İnnovasiyalar üzrə Dövlət Agentliyinin Elektron hökümət və rəqəmsal innovasiyalar şöbəsinin Elektron hökumət məsələləri sektorunda aparıcı məsləhətçi (1 vakant yer üzrə 26 namizəd) və Masallı regional "ASAN xidmət" mərkəzinin Səyyar xidmətin təşkili sektorunda baş məsləhətçi (1 vakant yer üzrə 26 namizəd), Maliyyə Nazirliyinin Dövlət Borcunun İdarə Edilməsi Agentliyinin Dövlət borcunun uçotu və hesabatı sektorunda aparıcı məsləhətçi (1 vakant yer üzrə 18 namizəd) vəzifələri üzrə qeydə alınıb.

Müsahibədə iştirak üçün qeydiyyatdan keçən namizədlər müsahibə vaxtı və yeri haqqında daha ətraflı məlumatı buradan əldə edə bilərlər.

Namizədlərdən müsahibə vaxtından ən az 30 dəqiqə əvvəl müsahibələrin keçiriləcəyi binaya yaxınlaşmaları xahiş olunur.