Tələbələri qışda qısaqol köynəkdə gəzən, rektoru ilə “atışan” Akdeniz Univeristeti
Son illər xarici ölkələrlə əlaqələrin genişlənməsi, dünyaya inteqrasiya nəticəsində, gənclərin xaricdə təhsilə marağı daha da artıb. Təbii ki, burada maraq, istiqamət və niyyətlər fərqlidir. Bəziləri xaricdə təhsil alıb, daha yaxşı karyera quracağını düşünür. Diqqətçəkən məqamlardan biri də budur ki, gənclər hansı ölkədə təhsil alacaqlarını, sevdikləri şəhər, büdcə və ya qəbul olduqları təqaüd proqramına əsasən, müəyyən edirlər. Universitet və ixtisas seçimi bir sıra suallar yaratdığından onlar qərarlarından əmin ola bilmirlər.
Gənclərin bu kimi suallarını cavablandırmaq üçün AzEDU.az saytı “UniverMAYAK” rubrikasında sizləri müxtəlif universitetlərlə tanış etməyə davam edir. Haqqında danışacağımız növbəti təhsil ocağı Türkiyənin ən güclü ali məktəblərindən sayılan Akdeniz Universitetidir.
Akdəniz Universiteti 1982-ci ildə Antalyada təsis edilmiş dövlət universitetidir. 42.000-dən çox tələbənin təhsil aldığı universitetdə 22 fakültə, 7 institut, 3 məktəb,1 kanservatoriya, 12 peşə məktəbi, 57 tədqiqat və tətbiq mərkəzləri fəaliyyət göstərir.
Akdeniz Universitetində Tibb, Tibb bacısı, Kənd Təsərrüfatı, Təbii Elmlər, İqtisadiyyat, Biznes, İdarəetmə, Hüquq, Mühəndislik, Təhsil, Rabitə, İncəsənət, Balıqçılıq, İlahiyyat, Stomatologiya və Turizm fakültələri var.
Görkəmli məzunları arasında 2011-ci ildə Türkiyənin ilk tam üz nəqli əməliyyatını edən cərrah Ömər Özkan, Manuş Baba adı ilə tanınan Mustafa Özkan və başqaları var. Mustafa Özkan kəsirlərinə görə məzun ola bilməyib.
Universitetin rektoru, professor Mustafa Ünaldır.
Akdeniz Universitetinin Jurnalistika fakültəsinin qəzetçilik ixtisasının magistratura pilləsində təhsil alan Orxan Cuvarlı AzEDU.az-a oxuduğu ali təhsil müəssisəsi barədə danışıb. O, deyib ki, Akdeniz Universiteti əsasən, Tibb fakültəsi ilə məşhur idi. Keçmiş zamanda danışmasının səbəbini isə bu cür əsaslandırıb: “”İdi” deyirəm çünki, hazırda bəzi uğursuz əməliyyatlar universitet rəhbərliyinin başını ağrıdıb. Bu arada qeyd edim ki, Türkiyədə ilk üz köçürmə əməliyyatı bu universitetdə olub. Daha sonra ədəbiyyat fakültəsi, özəlliklə alman və ingilis ədəbiyyatı bölümləri, Arxeologiya, Güzel Sanatlar fakültəsi üzrə ixtisaslaşmış ən yaxşı universitetlərdən biridir. Hüquq, Beynəlxalq münasibətlər, Jurnalistika kimi fakültələrini çox yaxşı saymaq olar. Ümumilikdə isə universitet, “Twitter”də tələbələrə maraqlı, ironiyalı cavabları ilə məşhur olan rektoru Mustafa Ünalla və dənizə yaxın məsafədə olmasıyla və Türkiyənin ən böyük ikinci universitet korpusu ilə tanınır”.
Orxanın sözlərinə görə, texniki təchizat baxımından kifayət qədər inkişaf etmiş fakültələr var:
“Yeni “İletişim” binasına köçmüşük, texniki otaqları gəzəndə xeyli şad oldum. Laboratoriyalar barədə heç bir təsəvvürüm yoxdu. Rektorumuzun ixtisasca həkim olduğunu nəzərə alsaq, məncə diqqətdənkənar qalmış olmaz”.
Universitetdə Afrika, Balkan ölkələrindən, türk cümhuriyyətlərdən tələbələr çoxluq təşkil edir.
Orxan deyir ki, bura tələbə axının əsas səbəbi universitet yox, şəhərdir.
“Antalyanın iqlimi, liman şəhəri olmağı, turistik yerləri insanları cəlb edir. Kim fevralda qısaqol köynəkdə gəzmək istəməz?”
Əsmər Qabil
