https://www.zirve.edu.az/ #
2021-07-05 18:13:00
XV Bakı Yay Enerji Məktəbinə start verilib  

İyulun 5-də ADA Universitetinin Xəzər Enerji və Ətraf Mühit Mərkəzinin SOCAR və “BP Azerbaijan” ilə əməkdaşlıq çərçivəsində birgə təşkil etdiyi 15-ci Bakı Yay Enerji Məktəbinin rəsmi açılış mərasimi keçirilib.

 

Universitetdən AzEdu.az-a bildirilib ki, Bakı Yay Enerji Məktəbi Xəzər bölgəsinə xüsusi diqqət yetirməklə enerji və ekoloji məsələlərin araşdırılması və daha yaxşı anlaşılması üçün dünyanın tanınmış alim, siyasətçi və mütəxəssislərini bir araya gətirən ənənəvi olaraq keçirilən iki həftəlik sertifikat proqramıdır.

 

COVID-19 pandemiyası ilə əlaqədar olaraq builki proqram 2021-ci il iyulun 5-10-da onlayn formatda həyata keçiriləcək. Cari ildə Bakı Yay Enerji Məktəbinə 15 ölkədən 43 iştirakçı seçilib. Proqramda enerji şirkətlərinin kiçik və orta mütəxəssisləri, müxtəlif dövlət qurumlarının səfirliklərin və beynəlxalq təşkilatların siyasətçi və dövlət qulluqçuları, həmçinin enerji və ətraf mühit məsələlərini araşdıran alim, jurnalist və aspirantlar iştirak edirlər.

 

Proqram enerji və ətraf mühitin öyrənilməsində balanslı yanaşma əsasında həyata keçirilir. Bakı Yay Enerji Məktəbinin müəllim və məruzəçiləri akademiya, dövlət və özəl sektorların aparıcı milli və beynəlxalq ekspertləridir.

 

Proqramın sonunda iştirakçılara ADA Universitetinin rektoru və Azərbaycan Respublikası Dövlət Neft Şirkətinin prezidenti tərəfindən imzalanmış sertifikatlar təqdim olunacaq.