Rumıniyanın Aleksandr İoano Kuza Universitetində Dağlıq Qarabağdakı vəziyyət mövzusunda görüş keçirilib. Azərbaycan multikulturalizmi kursu çərçivəsində baş tutan görüşdə universitetin professorları, müəllim və tələbə heyəti iştirak edib.

Bakı Beynəlxalq Multikulturalizm Mərkəzinin mətbuat xidmətindən AzEdu.az-a verilən məlumata görə, əvvəlcə Rumıniyanın Aleksandr İoano Kuza Universitetində Azərbaycan multikulturalizmi fənnini tədris edən professor Lüdmila Bejenaru universitet rəhbərliyinə və tələbələrə Azərbaycandakı mövcud vəziyyət, eləcə də sentyabrın 27-dən ölkəmizdə davam edən müharibə, işğal olunmuş torpaqlarımız və Ermənistan-Azərbaycan Dağlıq Qarabağ münaqişəsi barədə ətraflı məlumat verib.

Sonra son günlər Dağlıq Qarabağda yaşananlar görüş iştirakçıları tərəfindən müzakirə olunub. Çıxış edənlər Dağlıq Qarabağdakı mövcud vəziyyətlə bağlı Azərbaycanın ağrısına şərik olduqlarını, eyni zamanda, ölkəmizin mövqeyini və ərazi bütövlüyünü dəstəklədiklərini vurğulayıblar.

Görüş iştirakçıların sülh və əmin-amanlıq diləkləri ilə yekunlaşıb.

Qeyd edək ki, Rumıniyanın Aleksandr İoano Kuza Universitetində Azərbaycan multikulturalizmi fənni Bakı Beynəlxalq Multikulturalizm Mərkəzi ilə universitet arasında 2019-cu ilin mayında əldə edilən razılaşma əsasında tədris olunur.