https://www.zirve.edu.az/
20.04.2018 13:23
Milli qəhrəmanın oğlu iki universitet arasında qalıb - “Belə çıxır, bir kursu havayı oxuyub?!”

Təfəkkür Universiteti ali təhsil müəssisəsi kimi 1992-ci ildən fəaliyyətə başlayıb. Azərbaycan Respublikası Nazirlər Kabinetinin 11 sentyabr 1995-ci il tarixli 202 saylı qərarı ilə dövlət qeydiyyatından keçərək, özəl ali məktəb statusu alan universitet 2016-cı ildən fəaliyyətini dayandırıb.

Ali təhsil müəssisəsinin rəhbərliyi 2016-cı il oktyabrın 11-də Təhsil Nazirliyinə müraciət edərək fəaliyyətinin dayandırılması barədə qərar qəbul edildiyini bildirib. Universitetin 5 illik akkreditasiya müddətinin 2016-cı ildə bitdiyini nəzərə alaraq, Azərbaycan Respublikası Təhsil Nazirliyi Təfəkkür  Universitetinin akkreditasiyasının keçirilməməsi, 2017-2018-ci tədris ili üçün tələbə qəbulunun proqnozlaşdırılmaması və tələbə kontingentinin digər ali təhsil müəssisələrinə yerləşdirilməsini təşkil etmək məqsədilə işçi qrupunun yaradılması barədə qərar qəbul edib.

Lakin burada təhsil alan tələbələrin ixtisas və qəbul imtahanlarında topladıqları bal nəzərə alınmaqla müvafiq ali təhsil müəssisələrində maneəsiz yerləşdirilməsi nəzərdə tutulub. Lakin universitet tələbələri hələ də müəyyən çətinliklərlə üzləşirlər.

Azərbaycanın Milli Qəhrəmanı Vahid Quliyevin oğlu Nicat Quluzadə də belələrindəndir.

Övladının üzləşdiyi problemlə bağlı AzEDU.az saytına danışan Milli Qəhrəman Təfəkkür Universitetinin oğlunun sənədlərini vermədiyini bildirib: “Oğlum Təfəkkür Universitetində oxuyub. Keçən il universitet bağlananda bildirdilər ki, istəyən Təhsil Nazirliyinin saytı vasitəsilə  ixtisası və yığdığı bala uyğun olaraq  hansısa ali məktəbə köçürülə bilər. Mənim oğlum da  bu yolla Bakı Biznes Universitetinə köçürüldü. Amma Təfəkkür Universiteti oğlumun sənədlərini vermir. Deyirlər ki, qayıdın universitetə. Axı bu adam Təhsil Nazirliyinin saytı ilə köçürülüb!”

O, problemlə bağlı aidiyyatı qurumlara müraciət etsə də, hələ də nəticə olmadığını vurğulayıb:

“Təxminən, sentyabr-oktyabr aylarında zəng edib dedilər ki, biz artıq məhkəməyə verib, qalib gəlmişik. Qayıdın, universitetinizə gəlin. Təhsil Nazirliyindən isə deyirlər ki, “yox, oğlunuz hara köçürülübsə, orada oxusun, həll olunacaq”.

Bu, “həll olunacaq məsələsi” artıq xeyli uzanıb. Bir semestr keçdi, ikinci semestr başa çatır,  amma bu uşağın hələ də əmri yoxdur.  Nə vaxt  nazirliyə zəng etsəm, eyni sözü deyirlər. Xatırladım ki, indi oğlum əmri olmasa da, Bakı Biznes Universitetinə dərsə gedir. Təfəkkür Universitinin prorektoru ilə də əlaqə saxlamışam. Deyir ki, “biz  məhkəməni udmuşuq. Ayın 15-ə kimi məhkəmənin qərarı tam çıxacaq, qayıdıb, burada təhsilinə davam etməlidir” .

Deyilənə görə, sonuncu apellyasiya məhkəməsi aprelin 15-i olmalı idi, amma hələ də xəbər yoxdur. Deyirəm ki, yaxşı, bir il burada oxumuş uşağı yenidən nə adla Təfəkkür Universitetinə  qəbul edirsiz? Nədən imtahan verəcək? Cavab verirlər ki, gəlsin, biz nəzərə alacağıq. Belə çıxır ki, bu uşağın oxuduğu  bir  kurs  havada qalıb”.

Milli qəhrəman oğlundan fərqli olaraq, bəzi tələbələrin artıq Təfəkkür  Universitetinə qayıtdığını açıqlayıb:

“Övladım hazırda üçüncü kurs tələbəsidir. III kursun sentyabrından burada oxuyur. Digər qrup yoldaşlarından da Naxçıvana, Texniki Universitetə köçürülənlər var. Bəziləri artıq Təfəkkür  Universitetinə qayıdıblar. Kimlərin kəsri vardısa, deyiblər ki, gəlin, sizə qiymət yazacağıq və s. Onlar da qayıdıblar. Mən isə Təfəkkür Universiteti problemli universitet olduğuna görə oğlumu oraya qayıtmağa qoymadım. Bu gün belə, sabah isə əksinə deyirlər. Həm də Biznes Universiteti evimizə yaxındır. O birinə isə 3 avtobusla gedir, saat yarım yolda olurdu”.

Qeyd edək ki, bu ali təhsil müəssisəsinin bağlanmasına səbəb kimi akkreditasiya müddətinin bitməsi və  universitetin Təsisçilər Şurasının maliyyə  durumunda yaranmış problemlər göstərilir.

Qeyd: AzEDU.az mövzunu diqqətdə saxlayacaq.

Lamiyə Süleymanlı
Müəllifin digər yazıları