Alimlərin apardığı yeni tədqiqat yuxuların təsadüfi görüntülər toplusu olmadığını göstərib. Araşdırmaya görə, insanın gördüyü yuxular həm gündəlik həyatda yaşadığı hadisələrdən, həm də fərdi xüsusiyyətlərindən təsirlənərək formalaşır.
AzEdu.az xarici mediya istinadən xəbər verir ki, tədqiqat çərçivəsində 3 700-dən çox yuxu və oyaq vəziyyətdəki düşüncə hesabatı təhlil edilib.
Məlum olub ki, beyin yuxu zamanı gün ərzində yaşanan hadisələri olduğu kimi təkrarlamır. Əksinə, müxtəlif xatirələri, emosiyaları və təcrübələri birləşdirərək yeni ssenarilər yaradır.
Tədqiqatçılar bildirirlər ki, bu proses beynin məlumatları emal etməsinə, emosional təcrübələri nizamlamağa və gələcək situasiyalara hazırlaşmağa kömək edə bilər. Onların fikrincə, yuxular insan psixologiyasını və yaddaş mexanizmlərini daha yaxşı anlamaq üçün mühüm ipucları təqdim edir.
Alimlər hesab edirlər ki, əldə olunan nəticələr gələcəkdə yuxu pozuntularının, travma sonrası stressin və bəzi psixoloji xəstəliklərin müalicəsi istiqamətində yeni tədqiqatlara zəmin yarada bilər. Bununla belə, bu mexanizmlərin tam izahı üçün əlavə araşdırmalara ehtiyac olduğu vurğulanır.
