Alimlər insan gözünün təbii şəraitdə qavraya bilmədiyi yeni bir rəng təcrübəsi yaratdıqlarını açıqlayıblar.
AzEdu.az xarici mediaya istinadən xəbər verir ki, lazer texnologiyası əsasında hazırlanan xüsusi metod vasitəsilə müşahidə edilən və "olo" adlandırılan bu rəngin görmə elmi sahəsində mühüm yenilik hesab olunduğu bildirilir.
ABŞ-nin Berkli şəhərində yerləşən Kaliforniya Universitetinin tədqiqatçıları tərəfindən hazırlanmış "Oz Görmə Sistemi" adlanan texnologiya gözün yalnız M tipli konus hüceyrəsini stimullaşdıraraq insanların adi şəraitdə görə bilmədiyi bir rəng hissi yaradıb. Araşdırmanın nəticələri Science Advances jurnalında dərc olunub.
Tədqiqat zamanı iştirakçılar gördükləri rəngi mövcud rənglərlə müqayisə etməyə çalışıblar. Nəticələr göstərib ki, "olo" təbii rəng spektrində rast gəlinməyən, son dərəcə intensiv mavi-yaşıl çalar kimi qəbul edilir. Alimlərin sözlərinə görə, iştirakçılar bu rəngi təsvir edə bilmək üçün ağ işıq əlavə etməli olublar ki, bu da onun görünən rəng diapazonundan kənarda olduğunu göstərir.
Yeni rəngin adı da elmi əsaslara söykənir. "Olo" adı gözün L, M və S tipli konus hüceyrələrindən yalnız M konusunun aktiv olduğunu ifadə edən "010" kodundan götürülüb.
Bununla yanaşı, kəşf elmi ictimaiyyətdə müzakirələrə səbəb olub. Londondakı St. George Universitetinin görmə üzrə mütəxəssisi professor Con Barbur bunun tamamilə yeni rəng olmadığını, yalnız M konuslarının stimullaşdırılması nəticəsində yaranan daha intensiv yaşıl çalar olduğunu bildirib.
Tədqiqatçılar hesab edirlər ki, gələcəkdə "Oz" texnologiyası rəng korluğu üzrə simulyasiya sistemlərində, tibbi görüntüləmədə və digər görmə texnologiyalarında tətbiq oluna bilər. Bununla belə, araşdırmanın həmmüəllifi Ceyms Fonq hazırkı sistemin yüksək dəqiqlikli lazer və mürəkkəb optik avadanlıq tələb etdiyini vurğulayaraq, yaxın gələcəkdə bu texnologiyanın mobil telefon və ya televiziya ekranlarına inteqrasiya edilməsinin mümkün olmadığını qeyd edib.
