İsveçin Uppsala Universitetinin alimləri Günəşdəki gümüş miqdarının əvvəlki hesablamalardan 55 faiz çox olduğunu müəyyən ediblər.
AzEdu.az xarici mediaya istinadən xəbər verir ki, tədqiqatçılar Günəş işığını spektroskopik üsulla analiz edib və daha dəqiq atmosfer modeli hazırlayıblar. Yeni model gümüş atomlarının işıqla qarşılıqlı təsirini əvvəlki hesablamalardan daha düzgün nəzərə alıb.
Araşdırma Günəş sistemində uzun illərdir mövcud olan “itkin gümüş” probleminə də aydınlıq gətirib. Yeni hesablamalar Günəşdəki gümüş miqdarını 4,6 milyard il əvvəl onunla eyni qaz və toz buludundan yaranan qədim meteoritlərdəki göstəricilərə daha da yaxınlaşdırıb.
Alimlər bildirirlər ki, yeni metod digər ulduzların tərkibinin və gümüş kimi ağır elementlərin kainatda necə yarandığının öyrənilməsinə də kömək edə bilər.
