Bakı Mühəndislik Universitetində (BMU) “Kibertəhlükəsizlikdə ilk addımlar” adlı seminar keçirilib.
AzEdu.az xəbər verir ki, seminarda açılış nitqi ilə çıxış edən BMU-nun İnformasiya və kompüter texnologiyaları fakültəsinin kafedra müdiri Cabir Məmmədov tədbirin tələbələrin müasir texnoloji yeniliklərdə bilik, eləcə də bacarıqlarının artırılması məqsədi daşıdığını bildirib. Qeyd edib ki, belə seminarlar, həmçinin nəzəri bilikləri təkmilləşdirmək üçün əlverişli təcrübə mühiti yaratmağa xidmət göstərir. Kafedra müdiri universitetdə uyğun ixtisaslarda oxuyan tələbələr arasında aprelin əvvəlində test keçiriləcəyini, nəticələrə müvafiq olaraq bir qrupun çalışmaq üçün Kibertəhlükəsizlik laboratoriyasına seçiləcəyini diqqətə çatdırıb və gəncləri seminarda fəal olmağa çağırıb.
Sonra Kibertəhlükəsizlik və kompüter mühəndisliyi kafedrasının müəllimi Ömər Şükürov “CTF (Capture the Flağ) yarışları nədir?” mövzusunda təqdimatla çıxış edib. Təqdimatda CTF oyunlarının kateqoriyaları, müxtəlif CTF formatları haqqında məlumat verilib. Kibertəhlükəsizlik yarışlarının kompüter və kibertəhlükəsizlik biliklərinə əsaslandığını deyən məruzəçi CTF-yə başlamaq üçün, ilk növbədə əsas anlayışları öyrənməyin vacibliyini vurğulayıb. Əlavə edib ki, CTF təcrübəsinə malik olmaq bu platformanı öyrənənlərə müəyyən status qazandırır və geniş iş imkanları yaradır.
Seminarda daha sonra BMU-nun Kibertəhlükəsizlik laboratoriyasının müdiri Kamran Abdullazadə və laboratoriyanın mütəxəssisi Mədin Qəhrəmanov çıxış ediblər. Məruzəçilər kibertəhlükəsizlikdə hücumun necə həyata keçirilməsi, eləcə də müdafiənin necə qurulması ilə bağlı məlumat veriblər.
Seminarın sonunda tələbələrin sualları cavablandırılıb.
