http://azeduacademy.com/az/categories/41 http://www.position.az/ https://www.zirve.edu.az/
2022-05-13 16:48:00
KOICA-nın yeni layihəsi ilə bağlı işçi qrup BMU-da olub  

Bakı Mühəndislik Universitetində (BMU) Koreya Beynəlxalq Əməkdaşlıq Agentliyi (KOICA) tərəfindən maliyyələşdirilən  “Azərbaycanda innovasiya siyasətinin səmərəliliyinin artırılması məqsədilə innovasiyalar üzrə strateji yol xəritəsinin hazırlanması” layihəsi ilə əlaqədar ölkəmizdə səfərdə olan işçi qrupla görüş keçirilib.

 

AzEdu.az xəbər verir ki, Azərbaycan Respublikasının Rəqəmsal İnkişaf və Nəqliyyat Nazirliyinin tabeliyində fəaliyyət göstərən İnnovasiya və Rəqəmsal İnkişaf Agentliyinin Koreya İnkişaf Strategiya İnstitutu ilə cari ildən birgə icra etdiyi layihədə BMU-nun tərəfdaş kimi iştirakı üçün ilkin danışıqlar aparılıb və müsbət rəy alınıb.

 

Görüşdə BMU-nun Beynəlxalq əlaqələr üzrə prorektoru, dosent Manafəddin Namazov ali təhsil ocağının beynəlxalq əlaqələrindən və beynəlxalq layihələr çərçivəsində həyata keçirilən proqramlardan söz açıb. Prorektor artıq 2 ildir ki, BMU ilə Cənubi Koreyanın İNHA Universiteti arasında icra olunan ikili diplom proqramı çərçivəsində görülən işləri də nəzərə çatdırıb.

 

BMU Texnoparkının baş mütəxəssisi Arif Nəcimov ali təhsil ocağının fəaliyyəti ilə bağlı təqdimatla çıxış edib. BMU-da mövcud olan fakültələr və ixtisaslar barədə məlumat verən A.Nəcimov universitetdə ali təhsilin bütün səviyyələri üzrə tədrisin aparıldığını vurğulayıb. Təqdimatda BMU-nun maddi-texniki bazası, müasir laboratoriyaları barədə zəruri informasiyaları diqqətə çatdıran baş mütəxəssis universitetin nəzdində yaradılan Xırdalan Seconq İnstitutun fəaliyyətinə, hazırda icra olunan müxtəlif təlim proqramlarına və digər əməkdaşlıq istiqmətlərinə toxunub.

 

Startap Ekosistem üzrə müşavir Kevin (Kyu Hüang) Yeon Cənubi Koreyada startapların inkişaf yolu barədə təqdimatında ölkəsində həyata keçirilən, həmçinin dövlətin dəstəklədiyi startaplar layihələrinə yer ayırıb.

 

İdarəetmə elmi üzrə dosent və “TechEdu Inc” şirkətinin rəhbəri  Lee, Jeong Hoon “Azərbaycanda innovasiya siyasətinin səmərəliliyinin artırılması məqsədilə innovasiyalar üzrə strateji yol xəritəsinin hazırlanması” layihəsinin əsas məqsədi barədə danışıb.

 

Sonra toplantıda gələcək əməkdaşlıq imkanları və istiqamətləri ilə bağlı geniş fikir mübadiləsi aparılıb.

 

Görüşdə Mühəndislik fakültəsinin dekanı, dosent Hüseyn Mirzəyev, Avtomatika və elektroenergetika kafedrasının müdiri, profesor Ramiz Hümbətov, Mexanika mühəndisliyi laboratoriyasının müdiri Rüstəm Kələntərov, Elm və innovasiya şöbəsinin müdiri Elçin Yusubov, KOICA-nın proqram koordinatoru Şin Min Kyung və Azərbaycan nümayəndəsi Səidə Səidi, Koreya İnkişaf Strategiya İnstitutunun qrup rəhbəri Myeong Seok Song və baş elmi işçisi Soohyun Rhee, “D” Şirkətinin startap akseleratoru Bang, Seung Ae və İnnovativ biznes üzrə proqram rəhbəri Min Lyou iştirak ediblər.

 

Sonda layihənin işçi qrupu universitetin kampusu, laboratoriyaları və Texnoparkı ilə yaxından tanış olublar.