Çin ali təhsil müəssisələri süni intellekt və robotikanın birləşdiyi yeni sahə “embodied intelligence” üzrə bakalavr proqramlarını açmağa hazırlaşır. Bu ixtisasın məqsədi gələcəyin əsas texnologiyalarından sayılan robotika, humanoid sistemlər və ağıllı mexaniki qurğular üçün yüksək ixtisaslı kadrlar yetişdirməkdir.
AzEdu.az xarici mediaya istinadən xəbər verir ki, yeni proqramın tətbiqi ilk olaraq ölkənin aparıcı texniki universitetlərində o cümlədən nüfuzlu ali məktəblərdə planlaşdırılır. Tədris proqramı süni intellekt, maşın öyrənməsi, robot mexanikası, sensor sistemləri, kompüter elmləri və fiziki sistemlərin idarə olunması kimi sahələri özündə birləşdirəcək.
Rəsmilər bildirirlər ki, Çində robotika və AI mühəndislərinə tələbat sürətlə artır. “Embodied intelligence” ixtisasının açılması isə həm sənayenin kadr ehtiyacını qarşılamaq, həm də ölkənin qabaqcıl texnologiyalara dair strateji hədəflərinə uyğun yüksək ixtisaslı mütəxəssislər hazırlamaq məqsədi daşıyır.
