Danimarka hökuməti 2026/2027-ci tədris ilindən etibarən məktəblərdə və məktəbdənkənar klublarda mobil telefonların istifadəsinə ciddi məhdudiyyətlər tətbiq etməyi planlaşdırır.
AzEdu.az xarici KİV-ə istinadən xəbər verir ki, yeni qərara əsasən, şagirdlər dərs zamanı şəxsi mobil telefon və digər internetə çıxışı olan qurğulardan istifadə edə bilməyəcəklər.
Bu addımın əsas məqsədi şagirdlərin dərs prosesinə diqqətini artırmaq, sosial media asılılığının qarşısını almaq və tədris mühitində daha sağlam sosial münasibətlər yaratmaqdır.
Təhsil Nazirliyi hesab edir ki, mobil cihazlardan davamlı istifadə şagirdlərin həm diqqətini yayır, həm də ictimai ünsiyyət bacarıqlarını zəiflədir. Hökumət bildirir ki, xüsusilə ibtidai və aşağı siniflərdə şagirdlər arasında emosional və sosial əlaqələrin gücləndirilməsi prioritet sayılır.
Yeni qaydalara görə, məktəblər öz daxilində mobil telefon siyasəti hazırlayacaq və bu qaydalar tədris saatlarında cihazların saxlanma və istifadəsinə dair konkret qaydaları müəyyən edəcək. Bəzi məktəblərdə telefonlar dərs başlanmadan xüsusi qutularda toplanacaq, digərlərində isə yalnız müəyyən fasilələrdə istifadəyə icazə veriləcək.
Təhsil naziri vurğulayıb ki, qərar müəllim və valideynlərin rəyləri əsasında hazırlanıb və məqsəd uşaqları cəzalandırmaq deyil, əksinə onlara diqqəti cəmləməyi, sosial mühitdə davranış bacarıqlarını gücləndirməyi öyrətməkdir.
Bu təşəbbüs Avropada artan “telefon qadağası dalğası”nın bir hissəsidir. Oxşar qərarlar son illərdə Fransa, Hollandiya, İsveç və Finlandiyada da qəbul olunub. Ekspertlər hesab edir ki, bu cür məhdudiyyətlər qısa müddətdə bəzi narahatlıqlar yaratsa da, uzunmüddətli perspektivdə təhsil keyfiyyətinin və şagirdlərin psixoloji rifahının yaxşılaşmasına gətirib çıxaracaq.
