“Microsoft” şirkətinin qurucusu Bill Qeytsin baza ali təhsili yox idi, heç zaman hər hansı bir universitetdən məzun da olmamışdı. Ancaq o, üç dəfə universitet məzunları üçün təşkil olunan tədbirdə iştirak edib və hətta nitq də söyləyib.

Bill Qeyts ilk dəfə bunu 2007-ci ildə Harvardda edib, sonra 2014-cü ildə Stanfordda. Onun üçüncü çıxışı Şimali Arizona Universitetini bitirən gələcək mühəndislərə və meşə təsərrüfatı mütəxəssislərinə ünvanlanmışdı.

Çıxışında o, özü də məzun olmaq və belə çıxışları dinləmək istədiyini bildirmişdi.

AzEdu.az Bill Qeytsin 5 məsləhətini təqdim edir:

Birinci məsləhət: "Həyatın birpərdəli oyun olmadığını yadda saxlamaq lazımdır. Bu isə o deməkdir ki, bu gün qəbul edilən qərarlar böyük əhəmiyyət kəsb edə bilər. Ancaq sabah və ya növbəti 10 il ərzində görəcəyiniz iş fərqli bir iş olmalıdır".

İkinci məsləhət: "Çox ağıllı olmaq mümkün deyil. Mən kolleci bitirəndə lazım olan hər şeyi bildiyimi düşünürdüm. Ancaq yeni bir şey öyrənmək üçün addım atırsınızsa, bu, bilmədiklərinizi qəbul etmək deməkdir. Karyeranızın hansısa məqamında mütləq təkbaşına həll edə bilməyəcəyiniz problemlə qarşılaşacaqsınız. Bu baş verəndə həyəcanlanmayın. Nəfəs alın. Özünüzü hər şeyi düşünməyə məcbur edin. Sonra isə bilmədiyinizi öyrənmək və məsləhət almaq üçün ağıllı insanlara müraciət edin".

Üçüncü məsləhət: "Bəzi vacib problemi həll edən tədqiqat obyekti seçin. Yaxşı əlamət odur ki, siz bir çox vacib məsələlərin həll edilməli olduğu vaxtda məzun olursunuz. Məsələn, bir çoxunuz meşəçi olacaqsınız. Professorlarınız sizə dəqiq meşə xəritələri yaratmaq üçün LIDAR-dan istifadə edən dronlar kimi qabaqcıl vasitələrdən danışıblar. İqlim dəyişikliyi ilə mübarizə aparmaq üçün bu texnologiyadan istifadə etməyin yeni yollarını tapa bilərsiniz. Bəziləriniz proqramçı kimi karyeraya başlamaq üzrəsiniz. Bütün insanların süni intellektdən faydalana biləcəyinə və ya süni intellektlə bağlı şübhələrin aradan qaldırılmasına kömək etmək üçün istedadınızdan istifadə edə bilərsiniz".

Dördüncü məsləhət: "Dostluğun gücünü unutmayın". Qeyts bir çox maraqlarını bölüşən, elmi fantastika romanlarını və kompüter jurnallarını sevən bir sinif yoldaşı ilə məktəbdə necə dost olduğunu izah edib. Bu dostun adı Paul Allen idi və onlar birlikdə Microsoft-u qurublar.

“Unutmayın ki, mühazirələrdə yanında oturduğunuz insanlar, sizinlə xizək sürənlər sadəcə dostlarınız deyil. Onlar sizin gələcək həmkarlarınız və iş ortaqlarınızdır".

Beşinci məsləhət: "Özünüzə bir qədər istirahət vermək heç də tənbəl olmaq demək deyil.
Mən sizin yaşında olanda bayramlara inanmırdım. Həftəsonlarına inanmırdım. Ətrafımdakı hər kəsi həqiqətən çox işləməyə məcbur edirdim. Microsoft-un ilk günlərində ofisim dayanacağa baxırdı və kimin tez getdiyini, kimin gec qaldığını izləyirdim. Amma yaşlandıqca, xüsusən də ata olandan sonra anladım ki, həyatda işləməkdən daha çox şey var. Bu dərsi öyrənmək üçün mənim gözlədiyim qədər gözləməyin. Lazım olanda fasilə verərək istirahət edin”.