2022-2023-cü tədris ili üzrə peşə təhsili müəssisələrinə tələbə qəbulunun I mərhələsi çərçivəsində müsabiqədən keçən şəxslər avqustun 27-dək müvafiq sənədləri qəbul olunduğu məktəbə təqdim etməklə qeydiyyatdan keçməlidirlər.
Bu barədə AzEdu.az-a Elm və Təhsil Nazirliyindən məlumat verilib. Bildirilib ki, şəxsin qəbul olunduğu peşə təhsili müəssisəsində müvafiq tarixədək qeydiyyatdan keçməməsi və ya sənədlərini tam təqdim etməməsi onun həmin ixtisas üzrə təhsil almaqdan imtina etməsi kimi qiymətləndirilir.
Qeyd edək ki, 2022-2023-cü tədris ili üzrə tələbə qəbulu 66 peşə təhsili müəssisəsində 127 ixtisas olmaqla 23 min 340 yer üzrə aparılıb. İlk mərhələdə www.portal.edu.az platforması vasitəsilə 22 min 16 nəfərdən 59 min 993 müraciət daxil olub. Alınan nəticələr builki müraciətçi sayının ötən ilin analoji göstəriciləri ilə müqayisədə 48 faiz çox olduğunu göstərir.
Peşə təhsili müəssisələrinə tələbə qəbulunun II mərhələsinin avqustun 30-dan sentyabrın 5-dək aparılması planlaşdırılır.
