Köçürülmə  prosesi  ilə  bağlı  tələbələri  maraqlandıran  əsas  məsələlərdən  biri  də  təhsilalma  formasının(əyani, qiyabi) dəyişdirilməsi   ilə  bağlıdır.

Ali  təhsil  müəssisələrinin  bakalavriat  səviyyəsində  tələbənin  öz  ixtisası  üzrə  təhsilalma  formasını  dəyişməsi  hansı  halda  mümkün  ola bilər? Eyni zamanda  tələbə  oxuduğu  ali  təhsil  müəssisəsində  təhsilalma  forması qiyabidirsə (yaxud  əyani) digər ali təhsil  müəssisəsinə  öz  ixtisası  yaxud  fərqli  ixtisas  üzrə  təhsilalma  forması  dəyişərək  hansı  halda  köçürülə  bilər?

Təhsil  Nazirliyi  AzEdu.az-ın  sorğusuna  cavab  olaraq  bildirib  ki, bu  zaman  tələbənin  qəbul  imtahanında  topladığı  bal  əsas  götürülür:

“Mövcud  qanunvericiliyə  əsasən, tələbələrin  köçürülməsi  məsələsinə  qış  və ya  yay  tətili  müddətində  transfer.edu.az  portalı  vasitəsi  ilə  baxılır. Ölkə daxilində  bakalavriat  səviyyəsində  tələbələrin  bir  ali  təhsil  müəssisəsindən digərinə  köçürülməsi, təhsilalma  formasını  və  ya  ixtisasını  dəyişməsi  o şərtlə  aparıla  bilər  ki, DİM  tərəfindən  keçirilən  qəbul  imtahanlarında tələbənin  topladığı  bal  qəbul  olunduğu  ildə  köçürülmək  istədiyi  ali  təhsil müəssisəsində  müvafiq  ixtisas (təhsilalma forması)  üzrə  minimal  keçid balından  az  olmasın.”

Bəs  hansı  halda  bakalavriat  səviyyəsində  tələbənin  köçürülməsi  DİM  tərəfindən  keçirilən  qəbul  imtahanlarında  topladığı  bal  nəzərə  alınmadan aparılır?

Bu  halları  aşağıdakılardır:

• Bakıda yerləşən dövlət ali təhsil müəssisəsindən ölkənin regionlarında (Sumqayıt şəhəri istisna olmaqla) yerləşən ali təhsil müəssisəsinə (öz ixtisası üzrə) köçürüldükdə;
• Ölkənin bir regionunda yerləşən ali təhsil müəssisəsindən digər regionda yerləşən (Bakı və Sumqayıt şəhərləri istisna olmaqla) ali təhsil müəssisəsinə (öz ixtisası üzrə) köçürüldükdə;
• Akademik məzuniyyətdən qayıtdıqda əvvəl təhsil aldığı ali təhsil müəssisəsində öz ixtisası üzrə kadr hazırlığı aparılmadıqda həmin müəssisədə digər ixtisas üzrə tələbələr sırasına daxil edildikdə;
• Ölkə ali təhsil müəssisələrinə beynəlxalq səviyyəli imtahanlarda qazandığı nəticələr (SAT, TOEFL İBT, İELTS və s.) əsasında qəbul olunduqda.

Qeyd  edək  ki, tələbələrin  ixtisasını  və  ya  təhsilalma  formasını  dəyişməsi, bir  ali  təhsil  müəssisəsindən  digərinə  köçürülməsi  birinci  semestr  başa çatdıqdan  sonra  həyata  keçirilir