Almaniya məhkəməsi müəllimələrin hicabına qadağanı “qəbuledilməz ayrıseçkilik” adlandırdı...

30.08.2020 15:55

Almaniya məhkəməsi müəllimələrin hicabına qadağanı “qəbuledilməz ayrıseçkilik” adlandırdı...

Almaniyanın Erfurt şəhərindəki əmək məsələləri üzrə Federal Məhkəmənin hakimləri qadın müəllimlərin hicab taxmalarına qoyulan qadağanın, sadəcə, ayrıseçkilik deyil, insan hüquq və azadlıqlarına uyğun olmayan bir pozuntu olduğuna qərar verib. Bununla onlar dövlət məktəblərində hicab geyinməsinə qoyulan qadağanı "konstitusiyaya zidd" adlandıran Almaniya Konstitusiya məhkəməsini dəstəkləyiblər.

AzEdu.az xəbər verir ki, Almaniyanın “RBB24” nəşrinin yaydığı məlumata görə, bəhs edilən qərar hicaba bürünən və onu iş yerində çıxarmaqdan imtina etdiyi üçün dini bitərəfliyin qorunması haqqında qanunla məktəbə işə qəbul edilməyən bir müsəlman qadının iddiasına cavab olaraq verilib.

Bu qanun Berlində qüvvədədir və müəllimlərin iş yerində dini simvol gəzdirməsi və ya dini libas geyinməsini qadağan edir. Məhkəmə qanunda göstərilən tələbləri “dini zəmində qəbuledilməz ayrı-seçkilik” adlandırıb.

Məhkəmənin qərarına baxmayaraq zərər çəkən qadın işə qəbul olunmasını tələb edə bilməz, lakin bir ay yarımlıq əmək haqqı miqdarında maddi təzminat alacaq.

Qərar Berlin Təhsil senatoru Sandra Şeers tərəfindən tənqid edilib. O, Berlin kimi dini fərqli bir metropolda müəllimlərin bitərəf olmalarının gərəkliyini vurğulayıb. Senatorun fikrincə, əks təqdirdə bu, məktəblərdə münaqişələrə səbəb ola bilər.